დემოკრატიული მოძრაობის ლიდერი, ნინო ბურჯანაძე საპრეზიდენტო არჩევნებში მონაწილეობას არ აპირებს. ამის შესახებ მან დღეს, 8 სექტემბერს ბრიფინგზე განაცხადა:

"მიუხედავად იმისა, რომ დღეს ძალიან ბევრი ადამიანი ჩემი გულშემატკივარია ამ საპრეზიდენტო არჩევნებში, მე ვაცხადებ, რომ არ ვაპირებ ივანიშვილის მიერ დადგმულ ფარსში მონაწილეობას".

ბურჯანაძის თქმით, სანაცვლოდ, ის საპარლამენტო არჩევნებისთვის და ამ გზით ხელისუფლების შეცვლისთვის მზადებას იწყებს. ბურჯანაძის თქმით, ის აპირებს შექმნას ძალა, რომელიც ქვეყანაში არსებულ რეალობას შეცვლის:

"საარჩევნო გარემო 2012 წელთანაც კი უკიდურესად გაუარესებულია. ქვეყანაში არჩევნებმა აზრი დაკარგა. მე ჩემს თანამოაზრეებთან ერთად ვიბრძოლებ იმისათვის, რომ საზოგადოება გააქტიურდეს. მე შევქმნი ძალას რომელიც არ დაუშვებს საპარლამენტო არჩევნების ასეთ გარემოში ჩატარებას და ივანიშვილის მონა პარლამენტის მიღებას. მე შევქმნი ძალას, რომელიც აიძულებს ხელისუფლებას ან შეცვალოს საარჩევნო გარემო, ჩაატაროს დემოკრატიული არჩევნები, ან მოშორდეს ხელისუფლებას".

საპრეზიდენტო არჩევნები 28 ოქტომბერს არის დანიშნული. ამ ეტაპისთვის სულ 42 პრეზიდენტობის კანდიდატია დარეგისტრირებული.