ქართული ოცნების დეპუტატი, ანრი ოხანაშვილი, ხორავას ქუჩის საქმის საგამოძიებო კომისიის ფარგლებში მომზადებულ ევროპული საქართველოს დასკვნას არ ეთანხმება და მას "ვიწრო პოლიტიკური, პარტიული ინტერესებით გაჯერებულს" უწოდებს. ამის შესახებ მან დღეს, 5 სექტემბერს პარლამენტის საშემოდგომო სესიის პლენარულ სხდომაზე განაცხადა:

"ეს არის პოლიტიკური რევანშის მცდელობა, რომლის შესაძლებლობასაც არ მივცემთ არავის".

ანრი ოხანაშვილის მტკიცებით, ქართული ოცნების მიერ მომზადებული ალტერნატიული დასკვნა გაცილებით "ობიექტურია":

"ჩვენ დავადგინეთ, რომ ადგილი ჰქონდა გამოძიების წარმართვის პროცესში ხარვეზებს, რომ ამ ხარვეზებმა გავლენა იქონია მტკიცებულებათა ხარისხზე, ჩვენ დავადგინეთ, რომ ადგილი ჰქონდა კომუნიკაციის პრობლემას დაზარალებულ ოჯახებთან და საზოგადოებასთან, შესაბამისი ორგანოების მხრიდან. ვადგენთ იმას, რომ საჭიროა რეკომენდაციების გაცემა ამ მიმართულებით. საჭიროა რეფორმირება, რომ გვქონდეს ეფექტური საგამოძიებო სისტემა. დავადგინეთ კონკრეტულ პირებთან მიმართებით, რომ აუცილებელია ცალკეულ პირებთან მიმართებით საგამოძიებო ორგანო დაინტერესდეს მათ როლთან დაკავშირებით. ჩვენ ვერ ვიქნებით სისხლისსამართლებრივი დევნის განმახორციელებელი ორგანო, რისი სურვილიც აქვს ოპოზიციას, ჩვენ ვერ ვიქნებით სადამსჯელო ორგანო".

საგამოძიებო კომისია

პარლამენტში ხორავას ქუჩაზე მოკლული ორი მოზარდის საქმესთან დაკავშირებით პარლამენტის დროებითი საგამოძიებო კომისია 6 ივნისს შეიქმნა.

საქართველოს კანონმდებლობით კომისია ვალდებულია, შექმნიდან ზუსტად სამი თვის თავზე წარმოადგინოს დასკვნა. ბოლო თვეების განმავლობაში კომისიის წინაშე წარგნენ, როგორც საგამოძიებო ორგანოების თანამდებობის პირები, ისე ხორავას ქუჩაზე მომხდარი მკვლელობის მოწმეები და აღმასრულებელი ხელისუფლების წარმომადგენლები. კომისიის ერთ-ერთ ბოლო საჯარო სხდომაზე გამოკითხეს შინაგან საქმეთა მინისტრი გიორგი გახარია და ყოფილი მთავარი პროკურორი, ირაკლი შოთაძე.

2018 წლის 31 მაისს ხორავას ქუჩაზე მომხდარი მკვლელობის საქმეზე მოსამართლემ განაჩენი გამოაცხადა, რასაც დაზარალებული ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.

მთავარი პროკურორი ირაკლი შოთაძე, რომლის უწყების პოზიციაც სასამართლომ ბოლომდე არ გაიზიარა, თანამდებობიდან გადადგა. მკვლელობის საქმეზე ახალი გარემოებების დადგენის მიზნით, შსს-მ ხელახალი გამოძიება დაიწყო, რომელსაც უშუალოდ გიორგი გახარია ხელმძღვანელობს. გამოძიების ფარგლებში მირზა სუბელიანი დანაშაულის შეუტყობინებლობისთვის, ხოლო მერაბ მორჩაძე მოწმეზე ზემოქმედების ბრალდებით დააკავეს.