ქართული მარშის ერთ-ერთმა ლიდერმა ლადო სადღობელაშვილმა ფეისბუქით განაცხადა, რომ "პოლიტიკური და პირადი შეხედულებებიდან გამომდინარე" მოძრაობას ტოვებს. მისივე თქმით, ქართული მარში დატოვა ირაკლი დოლენჯაშვილმა. ინფორმაცია საღობელაშვილმა On.ge-საც დაუდასტურა.

"9 სექტემბერი საქართველოს სპორტულ ისტორიაში ერთ-ერთი მნიშვნელოვანი თარიღია... მავანნი მას შეგნებულად ცდილობენ, ჩირქი მოსცხონ და მსოფლიო არენაზე ქვეყანას შეუბღალონ ისტორიული სახელი, ტოლერანტობის და ოდითგანვე თავისუფლებისათვის ლტოლვის ავტორიტეტი მარგინალურად გააცამტვერონ", — წერს სადღობელაშვილი.

მან 9 სექტემბერს დინამო არენაზე საქართველოს საფეხბურთო ნაკრები ლატვიას შეხვდება. ქართული მარშის წევრები ეროვნული ნაკრების, გურამ კაშიას მიერ #EqualGames-ის ჯილდოს მიღების გაპროტესტებას აპირებენ. ამ აქცია სადღობელაშვილმა პროვოკაცია უწოდა:

"არ წამოეგონ აღნიშნულ მარაზმს, რაც საქართველოში მიზანმიმართულ არეულობას ისახავს, მით უმეტეს ვაი-პატრიოტები რელიგიის სახელით ძალადობისკენ უბიძგებენ საზოგადოებას".

მარტში ლადო სადღობელაშვილი და ქართული მარშის რამდენიმე წევრი ხულიგნობისა და ძალადობის ბრალდებით დააკავეს. მათ რუსთავი 2-თან საპროტესტო აქცია გამართეს და ჟურნალისტს დავით ერაძეს სცემეს. ასევე, არხის იურისტის, თამთა მურადაშვილის მანქანას, რომელშიც გიორგი გაბუნიაც იჯდა, ალყა შემოარტყეს.

ივნისში კი თბილისის საქალაქო სასამართლომ მარშის წევრების ნაწილს, მათ შორის ლადო სადღობელაშვილს, აღკვეთის ღონისძიების სახით მისჯილი პატიმრობა გირაოთი შეუცვალა.