პრეზიდენტმა გიორგი მარგველაშვილმა მაესტროს ღამის კონტაქტისთვის მიცემულ ინტრევიუში, თავდაცვის სამინისტროში მიმდინარე მოვლენებზე ისაუბრა და განაცხადა, რომ ძველი და ახალი თავდაცვის მინისტრების საჯარო დისკუსია, არ არის სასარგებლო ქართული ჯარისათვის:

"ჩემი მიზანია, რომ თავდაცვის სამინისტრომ მაქსიმალურად გააძლიეროს თავდაცვისუნარიანობა და მაქსიმალურად შეუწყოს ხელი ქართულ არმიას იმისთვის რომ იყოს ბრძოლისუნარიანი. პიროვნული დისკუსია ახალ თავდაცვის მინისტრებს შორის, რომელსაც სამწუხაროდ თვალი მოვკარი ეთერში, ვფიქრობ არ არის მთლად სასარგებლო ქართული ჯარისათვის. ძალიან უნდა გავუფრთხილდეთ ქართველ ჯარისკაცს, რადგან სწორედ ისინი იცავენ ქვეყნის ღირსებას".

პრეზიდენტმა ასევე აღნიშნულ უწყებაში მინისტრების ცვლილებაზე ისაუბრა და თქვა, რომ სტატისტიკური თვალსაზრისით 4 წელიწადში 4 მინისტრი, ასეთი მნიშვნელოვანი სფეროსთვის, არ არის იდეალური მაჩვენებელი:

"ჩემთვის, ახალი თავდაცვის მინისტრი არის ის, რომელთანაც უნდა ვიმუშავო. მე მას შევხვდი და ჩვენ გვქონდა ინტენსიური და კონსტრუქციული დისკუსია. მან გამიზიარა ხედვა იმ რეალობასთან დაკავშირებით, რაც თავდაცვის სამინიტროშია".