ბავშვთა და ახალგაზრდობის ეროვნულმა ცენტრმა მანავის "მომავლის ბანაკის" მესამე დღის სატრენინგო სესია გურამ ფალავანდიშვილის მიმართვის საფუძველზე შეაჩერა. ბანაკში ტრენინგს ორგანიზაცია Gydea, გაეროს მოსახლეობის ფონდის ეგიდით უძღვებოდა. ორგანიზაციის ხელმძღვანელი, ედო დემეტრაშვილი On.ge-სთან საუბარში განმარტავს, რომ მათი სესია ჯანსაღი ცხოვრების წესის ხელშეწყობას ეხებოდა, რასაც საერთაშორისო სტანდარტებისა და რეკომენდაციების გათვალისწინებით ახორციელებენ.

გაეროს მოსახლეობის ფონდის საქართველოს ოფისი მრავალი წელია თანამშრომლობს ბავშვთა და ახალგაზრდობის ეროვნულ ცენტრთან და ამჟამად მიმდინარეობს კონსულტაციის პროცესი შემდგომი ნაბიჯების დასაგეგმად.

საქმე ეხება ფეისბუქგვერდ "ზნეობაზე" გავრცელებულ წერილს, სადაც გურამ ფალავანდიშვილს მშობლის სტატუსით მიმართავს ბანაკის აქტივობებით უკმაყოფილო ბადრი დავითური.

ბავშვთა და ახალგაზრდობის ცენტრში On.ge-ს განუცხადეს, რომ შეკითხვები 7-დღიანი საბანაკე პროგრამის მხოლოდ მესამე - ტოლერანტობის დღესთან დაკავშირებით გაჩნდა და ტრენინგები შეჩერდებოდა მანამ, სანამ გაეროს მოსახლეობის ფონდი სიტუაციას არ შეისწავლიდა.

ცენტრის ინფორმაციით, 19 აგვისტოს მანავის "მომავლის ბანაკის" ხელმძღვანელებს, 21 აგვისტოს კი ცენტრის მენეჯმენტს გურამ ფალავანდიშვილმა თანმხლებ პირებთან ერთად წარუდგინა ბადრი დავითურის განცხადება.

უწყების ცნობით, თუ რაიმე მსგავსი გაუგებრობა ხდება, ყოველთვის აჩერებენ აქტივობას, თუმცა, აზუსტებენ იმასაც, რომ ტრენინგის თემატიკაზე მსგავსი ტიპის მიმართვა პირველად მიიღეს.

ფეისბუქგვერდ "ზნეობაზე" გავრცელებული წერილის ავტორი დისკრიმინაციული ტერმინებით აღწერს სატრენინგო აქტივობებს და წერს, რომ მის შვილს უტარდებოდა "გაკვეთილები, რომელიც მიდრეკილი იყო მრუშობისკენ, გარყვნილებისკენ და უკუღმართობისკენ":

"კერძოდ, ასწავლიდნენ, რომ

1. კაცი უნდა იპარსავდეს ფეხებს;
2. უნდა ეკეთოს საყურე;
3. მამაკაცს უნდა ჰქონდეს კიკინები და ა.შ".

წერილში ავტორი ამბობს, რომ ტრენინგის მონაწილეებს ათამაშებდნენ "სულიერებისთვის ხიფათის შემცველ თამაშებს" და კითხვებზე "არას" მიღების შემთხვევაში დაფასთან მდგომ ბავშვს სკოჩავდნენ:

"მე, როგორც მართლმადიდებელი ქრისტიანი, ვფიქრობ ამ ბანაკების ასეთი ფორმით არსებობა სახიფათოა გარდატეხის ასაკში მყოფთა სულებისთვის".

წერილში ნახსენებ ბრალდებებს ცრუს, ცილისმწამებლურსა და არასწორად ინტერპტრეტირებულს უწოდებს ორგანიზაცია Gydea, რომელიც არაფორმალური განათლების აქტივობებს ტრენინგებზე, წლებია ატარებს.

ორგანიზაცია ფეისბუქის საკუთარ გვერდზე აქვეყნებს განცხადებას და წერს, რომ ბადრი დავითურის წერილში მითითებული სავარჯიშოები, ემსახურება მოზარდებისთვის გენდერული სტერეოტიპების შესახებ ინფორმაციის მიწოდებასა და სტერეოტიპების დამსხვრევას.

მათივე განმარტებით, სესიაზე გამოყენებული იყო ქაღალდის სკოჩი და სიცრუა ინფორმაცია იმასთან დაკავშირებით, თითქოს წებოვან ქაღალდს არ აძრობდნენ მონაწილეებს ტრენერები მანამ, სანამ არ აღიარებდნენ იმათ, რაც მათ სურდათ.

Gydea-ს განმარტება სავარჯიშოს შინაარსთან დაკავშირებით

ფეისბუქგვერდზე "ზნეობა", სადაც წერილი გავრცელდა, გვერდის ადმინისტრატორი, კომენტარში პარტნიორობა ადამიანის უფლებებისთვის ხელმძღვანელს, ანა აბაშიძეს, ჰომოფობიური ტერმინებით მოიხსენიებს და მიუთითებს, რომ სწორედ ის უძღვებოდა გასულ წელს ბავშვთა და ახალაზრდობის ცენტრის მიერ ჩატარებულ ტრენინგებს.

ანა აბაშიძე On.ge-სთან საუბრისას ამბობს, რომ თავად დიდი ხანია თანამშრომლობს ბავშვთა და ახალგაზრდობის ცენტრთან, თუმცა მანავის "მომავლის ბანაკთან" კავშირი არ აქვს. მისი შეფასებით, ის ფაქტი, რომ წერილში აღნიშნული ბრალდებების საფუძველზე შეწყდა ტრენინგები, სერიოზულ პრობლემას წარმოადგენს:

"ორგანიზაციას პროექტის ფარგლებში კიდევ ჰქონდა დარჩენილი რამდენიმე ტრენინგი და ამ განცხადებების გამო უთხრეს, რომ ტრენინგები აღარ ჩატარდება... შუა გზაში მოუწიათ პროექტის შეჩერება. როცა პროექტი აქვთ ცენტრის თანხმობის გარეშე არაფერი გამოვა, ეს ნიშნავს იმაზე მეტს, ვიდრე დაფინანსებაა".

ვინ არის გურამ ფალავანდიშვილი?

მედიის განვითარების ფონდის (MDF) კვლევაში "სიძულვილის ენა", ნათქვამია, რომ გურამ ფალავანდიშვილი 2017 წელს რეგისტრირებული ორგანიზაციის ბავშვთა უფლებების დაცვის საზოგადოების გამგეობის თავმჯდომარეა. ის 2016 წლის საპრლამენტო არჩევნებზე ბურჯანაძე – ერთიანი ოპოზიციის მთაწმინდის მაჟორიტარობის კანდიდატი იყო. ფალავანდიშვილი ექსტრემისტული ქმედებების გამო რამდენჯერმე იყო დაკავებული, მათ შორის 2013 წლის 4 დეკემბერს ხანუკას დღესასწაულზე პლაკატების ჩამოხევისა და ტრიბუნის დაზიანების გამო, ხოლო 2018 წლის 8 მარტს – ტრანსგენდერების აქციაზე მათთვის კვერცხების სროლის გამო.