გარემოს ეროვნული სააგენტოს განცხადებით, 20-23 აგვისტოს აღმოსავლეთ საქართველოს ზოგიერთ ნაწილში ისევ სეტყვაა მოსალოდნელი. სააგენტოს ცნობით, ქვეყნის ზოგ რაიონში სითბოს ფონზე ხანმოკლე წვიმა და ელჭექია მოსალოდნელი.

დასავლეთ საქართველოს დაბლობსა და აღმოსავლეთ საქართველოს ბარში ჰაერის ტემპერატურა, სავარაუდოდ, 28-33 გრადუსი იქნება.

ნალექს სანაპირო ზოლშიც ელიან. სააგენტოს ცნობით, შავი ზღვის სანაპირო რაიონებში ღამისა და საღამოს საათებში იწვიმებს, ხოლო ჰაერის ტემპერატურა 27, 29 გრადუსი იქნება.

თბილისში აღნიშნულ დღეებში მოსალოდნელია ხანმოკლე წვიმა ელჭექით. ჰაერის მოსალოდნელი ტემპერატურა კი 29, 31 გრადუსია.

18 აგვისტოს კახეთში უხვი ნალექი და ძლიერი სეტყვა მოვიდა. სეტყვამ კახეთში რამდენიმე ქალაქი დააზარალა. განსაკუთრებით დაზარალდა თელავის მუნიციპალიტეტი, სადაც ყურძნის ვაზები და საზამთროს ბაღები განადგურდა. ამასთან, დაიტბორა საცხოვრებელი სახლების პირველი სართულებიც.