გურიის გუბერნატორმა, მერაბ ჭანუყვაძემ თანამდებობა დატოვა. ამის შესახებ მან ფეისბუქის პირად გვერდზე დაწერა.

"ჩემო მეგობრებო, მივიღე გადაწყვეტილება დავტოვო თანამდებობა! ამ პერიოდის განმავლობაში მაქსიმალურად ვცდილობდი წარმომეჩინა ჩემთვის განსაკუთრებული მხარე!მინდა მადლობა გადავუხადო მოსახლეობას და ჩემს გუნდს, თქვენი მხარდაჭერა შეუფასებელია ჩემთვის. ვტოვებ თანამდებობას, მაგრამ ვრჩები ჩემი ხალხის და ჩემი ქვეყნის სამსახურში!", - წერს ჭანუყვაძე სოციალურ ქსელში.

მერაბ ჭანუყვაძის მიერ გუბერნატორის პოსტის დატოვების შესახებ ინფორმაცია გასულ თვეში, 26 ივლისსაც გავრცელდა. იმავე დღეს პრემიერმა ბრიფინგი გამართა და გუბერნატორების გათავისუფლების შესახებ განაცხადა. გათავისუფლებულებს შორის არ იყო მერაბ ჭანუყვაძე. ის თანამდებობაზე დარჩა.

მერაბ ჭანუყვაძე გურიის გუბერნატორის პოსტზე 2017 წლის 23 აგვისტოს დაინიშნა. იქამდე ის ოზურგეთის მუნიციპალიტეტის გამგებელი იყო. უცნობია, რჩება თუ არა ჭანუყვაძე "ქართული ოცნება-დემოკრატიული საქართველოს" ოზურგეთის ორგანიზაციის თავმჯდომარედ.

საქართველოს პრემიერ-მინისტრმა, მამუკა ბახტაძემ ახალი გუბერნატორები 6 რეგიონში დღეს, 20 აგვისტოს უნდა წარადგინოს. გუბერნატორების წარდგენა მთავრობის ადმინისტრაციაში 11:00 საათზე გაიმართება.

5 რეგიონის სახელმწიფო რწმუნებული თანამდებობიდან გასულ თვეში გაათავისუფლეს. კერძოდ, თანამდებობიდან გათავისუფლდნენ: შიდა ქართლის, მცხეთა-მთიანეთის, სამეგრელო-ზემო სვანეთის, ქვემო ქართლის და სამცხე-ჯავახეთის გუბერნატორები. მას შემდეგ, რაც გივი ჭიჭინაძე შუალედურ არჩევნებში პარლამენტის დეპუტატი გახდა, გუბერნატორი არ ჰყავს იმერეთსაც.