BBC-ის ცნობით, რუს ათლეტებს რიო 2016-ის პარაოლიმპიურ თამაშებში მონაწილეობა დოპინგის სკანდალის გამო აეკრძალათ.

საერთაშორისო პარაოლიმპიურმა კომიტეტმა რუსეთი მაკლარენის ანგარიშში მოყვანილი ფაქტების გამო დაადანაშაულა. კვლევა გასულ თვეში გამოქვეყნდა და იქ საუბარია რუსეთის სახელმწიფოს მიერ დაფინანსებულ დოპინგ პროგრამაზე.

პარაოლიმპიური კომიტეტის პრეზიდენტის ფილიპ კრავენის თქმით, მათი პასუხისმგებლობაა რომ პარაოლიმპიურ თამაშებზე სამართლიანი შეჯიბრი წარიმართოს:

"ერთიანობა და სანდოობა პარაოლიმპიურ სპორტში ყველაზე მნიშვნელოვანია ".

მისივე თქმით, დოპინგსაწინააღმდეგო სისტემა რუსეთში კორუმპირებულია და მოკლებულია ყოველგვარ სტანდარტებს.

პარაოლიმპიური თამაშები, შეზღუდული შესაძლებლობების მქონე ადამიანებისთვის, საერთაშორისო ოლიმპიური კომიტეტის დახმარებით ტარდება ოთხ წელიწადში ერთხელ, ოლიმპიური თამაშების პარალელურად.