ზუგდიდში, სკეიტ პარკში 2 დღის წინ აგვისტოს ომის გმირების მემორიალი უნდა გახსნილიყო. დღეს, 9 აგვისტოს მემორიალი არათუ გახსნილი, აღმართულიც არ არის და არც ისაა ცნობილი როდის დაიდგმება ის.

როგორც ერთ-ერთი დაღუპულის, სერგო გოროზიას დედა ამბობს, მემორიალის გახსნის ცერემონიის გადადების მიზეზი მისთვის გაუგებარია.

"ვემზადებოდი დიდის ამბებით, სტუმრები დაპატიჟებული მყავდა, ეს იყო ჩემი შვილის ქორწილის ტოლფასი", - აცხადებს მზია გოროზია რუსთავი 2-თან საუბრისას.

როგორც ზუგდიდის მერიის ძეგლთა დაცვის განყოფილების უფროსმა, ლაშა ჯიქიამ On.ge-სთან საუბრისას აღნიშნა, წელს, 2018 წლის აგვისტოში სიმბოლური მემორიალი უნდა დადგმულიყო. მისი განმარტებით, მოგვიანებით ექსპერტების აზრები მოისმინეს, რომლებმაც "უბრალო კომპოზიციად" შეაფასეს მემორიალი და უფრო კომპლექსური იდეა შეიმუშავეს.

"მიწა იყო გამოსაყოფი. ხომ უნდა შერჩეულიყო ადგილი, ამიტომაც ჩვენ მთელი რიგი პროცედურები გავიარეთ. შემდეგ საკონკურსო კომისია შეიქმნა ამასთან დაკავშირებით და ესეც დროს საჭიროებს.თანხაც მოვიძიეთ იმისათვის, რომ შეექმნათ ღირსეული მემორიალი", - აღნიშნა მან.

ჯიქია ამბობს, რომ ამ ეტაპზე მემორიალის ნიმუშების მისაღებად კონკურსია გამოცხადებული, რომელიც სექტემბრის დასაწყისში დასრულდება. მისი თქმით, ამ დროისთვის იურიდიული საკითხები მოგვარებულია და პროცესი დასკვნით ეტაპზეა გადასული.

მერიაში მემორიალის იდეების შეფასების კრიტერიუმები ასე ჩამოაყალიბეს:

  • თემატურად უნდა ეხებოდეს რუსეთ-საქართველოს ომს;
  • სასურველია, ხაზგასმული იყოს რომ 4 ჯარისკაცი დაიღუპა, მათი სახელები და გვარები ოქროს ასოებით იყოს ამოტვიფრული და მათი წოდებაც იყოს მინიშნებული;
  • უნდა გაითვალისწინონ სივრცით-გეგმარებითი ხედვა. ის სივრცე, სადაც ეს მემორიალი აღიმართება, კომპოზიციაში უნდა იჯდეს, რადგან ქალაქის ცენტრშია.