აშშ-მ თურქეთის ორი მინისტრის წინააღმდეგ სანქციები აამოქმედა. ეს დაკავშირებულია ამერიკელი პასტორის, ენდრიუ ბრანსონის საქმესთან, რომელიც 2016 წლის ოქტომბრიდან თურქეთშია დაკავებული.

"პრეზიდენტის განკარგულებით ფინანსთა სამინისტრომ შემოიღო სანქციები თურქეთის იუსტიციისა და შინაგან საქმეთა მინისტრების წინააღმდეგ, რომლებიც მნიშვნელოვან როლს თამაშობდნენ პასტორის დაკავებაში", - განაცხადა ბრიფინგზე თეთრი სახლის პრესმდივანმა, სარა სანდერსმა.

სანქციების შემოღება ნიშნავს, რომ ამერიკაში თურქეთის მინისტრების ყველა აქტივი და ანგარიში გაიყინება. ამასთანავე, აშშ-ის მოქალაქეებისთვის მათთან გარიგებების დადება აკრძალულია.

ბრანსონს ბრალად ედება ფეტულა გიულენთან კავშირი, რომელსაც 2016 წელს თურქეთში გადატრიალების მცდელობაში ადანაშაულებენ. პასტორი ყველა ბრალდებას უარყოფს. თურქეთის საგარეო საქმეთა მინისტრის განცხადებით, სანქციების შემოღებით აშშ ვერაფერს მიაღწევს.

ანკარისა და ვაშინგტონს შორის ურთიერთობები ბოლო პერიოდში განსაკუთრებით დაიძაბა. თურქეთი უკმაყოფილოა იმით, რომ აშშ-მ ფეტულა გიულენის გადაცემაზე უარს ამბობს. ასევე, მათთვის მიუღებელია სირიაში ქურთულ დაჯგუფებებთან აშშ-ის თანამშრომლობა.