Reuters-ის ინფორმაციით, რიო დე ჟანეიროში ოლიმპიური ცეცხლი საპროტესტო აქციის ფონზე ჩამოატარეს, რომლის მონაწილეებიც სამართალდამცავებმა ცრემლსადენი გაზით დაარბიეს. მოქალაქეების პროტესტის მიზეზი ქვეყნის მიერ ოლიმპიური თამაშებისთვის დახარჯული დიდი თანხა იყო.

რიო დე ჟანეიროში ამ დროისთვის უსაფრთხოების გაძლიერებული ნორმები მოქმედებს. ცნობილია, რომ 85 ათასი სამართალდამცავი პირია მობილიზებული იმისთვის, რომ ქალაქი შესაძლო ინციდენტებისგან დაიცვას.

რიოს ოლიმპიური თამაში ქვეყნისთვის რთულ პერიოდს დაემთხვა, ბრაზილიაში პრეზიდენტის იმპიჩმენტის საკითხი დგას და ვითარება ძალიან დაძაბულია. ადგილობრივი მოსახლეობისათვის ამ ეტაპზე მნიშვნელოვან საკითხად მძიმე ეკონომიკური პირობები რჩება, ამიტომ აცხადებენ, რომ ოლიმპიადისთვის სახელმწიფოს დიდი ოდენობის თანხები არ უნდა დაეხარჯა:

"ოლიმპიადა დროის ფუჭი კარგვაა. თამაშებს არანაირი სარგებელი არ მოაქვს რიო დე ჟანეიროსთვის".

რიოს ოლიმპიური თამაშები 6 აგვისტოს, გახსნის ცერემონიით დაიწყება. საქართველოს პრეზიდენტის ადმინისტრაციის ინფორმაციით, რიოში იმყოფებიან ასევე გიორგი მარგველაშვილი და პირველი ლედი, მაკა ჩიჩუა. ვიზიტის ფარგლებში, დაგეგმილია მარგველაშვილის და ჩიჩუას საქართველოს ოლიმპიურ ნაკრებთან შეხვედრა, პრეზიდენტი და პირველი ლედი ქართველი ოლიმპიელების გამოსვლებსაც დაესწრებიან.

საქართველოს პრეზიდენტი ბრაზილიის ფედერაციული რესპუბლიკის პრეზიდენტის მოვალეობის შემსრულებლის და მსოფლიო ოლიმპიური კომიტეტის პრეზიდენტის სახელით გამართულ ოფიციალურ მიღებას ზაფხულის ოლიმპიადის გახსნაზე დამსწრე სახელმწიფო ლიდერებთან ერთად დაესწრება.

რიო 2016-მდე ირკვევა, რომ რიოს წყლები სიცოცხლისთვის საშიშ ბაქტერიებს შეიცავს