შევძლებთ თუ არა მთვარის დაბნელების ნახვას ნაცრისფერი ცის გამო? - ამ კითხვამ სრულიად ქართული ინტერნეტი მოიცვა და როგორც აღმოჩნდა ორი პასუხი არსებობს. გარემოს ეროვნულ სააგენტოში On.ge-ს უთხრეს, რომ ნაცრისფერი ცა მთვარის დაბნელების ნახვაში ხელშემშლელი ფაქტორი არ იქნება, ასტროფოტოგრაფებს კი სხვა აზრი აქვთ.

Geo-Astro-ს დამფუძნებელმა დავით დვალმა On.ge-ს უთხრა, რომ თუ არსებული მეტეოროლოგიური პირობები შენარჩუნდება, ნაცრისფერი ცის გამო საქართველოს მოსახლეობა მთვარის დაბნელების ნახვას ვერ შეძლებს.

"მთვარე კი დაბნელდება, მაგრამ უჩვენოდ. ჩვენ ვერ დავინახავთ იმიტომ, რომ ცა მოღრუბლულია."

ასტროფოტოგრაფ დიმიტრი გოდერძიშვილსაც ანალოგიური მოსაზრება აქვს და მიაჩნია, რომ თბილისიდან მთვარის დაბნელებას ვერ დავინახავთ:

"ანძა არ ჩანს და მთვარე როგორ გამოჩნდება", - განაცხადა მან.

საქართველოში მთვარის დაბნელება დღეს, 27 ივლისს 21 საათსა და 14 წუთზე დაიწყება და მაქსიმუმს დაახლოებით 00 საათსა და 21 წუთზე მიაღწევს. ეს საუკუნის ყველაზე გრძელი მთვარის სრული დაბნელება იქნება და ის ერთი საათი და 43 წუთი გაგრძელდება.

მთვარის დაბნელებას მარსის მოახლოებაც ემთხვევა. 27-30 ივლისს მარსი დედამიწას 56 მილიონ კილომეტრზე მოუახლოვდება, ამიტომ მთვარის დაბნელებასთან ერთად ცაში მოკაშკაშე მოწითალო პლანეტაც შეიძლება შენიშნოთ.

ამავე თემაზე: