"ზოგჯერ შეიძლება კანონის ზღვარზე გადის ხალხის მოქმედება, მაგრამ მე როგორც ადგილობრივმა კარგად ვიცი ამ ხალხის მდგომარეობა, მათი შემოსავალი",- განაცხადა პრემიერ-მინისტრის მრჩეველმა, სოზარ სუბარმა სვანეთში მოსახლეობასთან შეხვედრის შემდეგ.

სპეცრაზმის შესვლასა და მოსახლეობის პროტესტთან დაკავშირებით სუბარმა აღნიშნა, რომ სახელმწიფოს აქვს უფლება იმოქმედოს მსგავს სიტუაციაში, თუმცა უწევს სხვადასხვა გარემოებების გათვალისწინება. ასეთ გარემეობად კი ის დაასახელა, რომ საქართველო ღარიბი ქვეყანაა. ამის შესახებ სუბარმა TV პირველის ეთერში ისაუბრა.

სოზარ სუბარის თქმით, მთავრობა იმუშავებს იმაზე, რომ ადგილობრივებს ალტერნატიული შემოსავლის წყარო ჰქონდეს. მისივე თქმით, ერთი კვირის განმავლობაში სვანეთში მთავრობის წარმომადგენლები ჩავლენ და ამ საკითხზე მუშაობა დაიწყება.

რამდენიმესაათიანი მოლაპარაკებები მთავრობის წარმომადგენლებსა და ადგილობრივებს შორის დასრულდა. მოსახლეობამ გადაკეტილი გზა გახსნა, სუბარის თმით კი სპეცრაზმი სვანეთის ტერიტორიას ტოვებს.

დღეს, 26 ივლისს ჭუბერსა და ხაიშში, სპეცდანიშნულების რაზმების გამოჩენას დაპირისპირება მოყვა. ადგილობრივებმა სპეცრაზმს სახლების ჩხრეკის უფლება არ მისცეს, ხელკეტები და ქვები დაუშინეს და გზა გადაკეტეს.

ფინანსთა სამინისტროს საგამოძიებო სამსახურის ინფორმაციით, ჭუბერსა და ხაიშში მოსახლეობა საგამოძიებო მოქმედებებს ხელს უშლიდა და სპეცრაზმის მობილიზებაც ამიტომ გახდა საჭირო.

უწყებაში ამბობენ, რომ სვანეთში ხე-ტყის გადამამუშავებელი და ხის მასალის რეალიზატორი საწარმოების საქმიანობის კანონიერების შემოწმება, ასევე რეგისტრაციის გარეშე მოქმედი ხის სახერხი საამქროების გამოვლენა მიმდინარეობს.