23 ივლისს დამასკოში დე ფაქტო სამხრეთ ოსეთის რესპუბლიკის პრეზიდენტი ანატოლი ბიბილოვი და სირიის პრეზიდენტი ბაშარ ასადი ერთმანეთს შეხვდნენ. ინფორმაციას დე ფაქტო საგარეო საქმეთა სამინისტრო ავრცელებს.

დე ფაქტო უწყების განმარტებით, ბიბილოვმა ტერორიზმთან ბრძოლაში ასადს მხარდაჭერა აღუთქვა. ბიბილოვმა, ასევე, აღნიშნა, რომ სირიისა და ცხინვალის რეგიონის ე.წ. დიპლომატიური ურთიერთობების გაღრმავება ახლანდელი და მომავალი თაობების ინტერესებში შედის.

შეხვედრის ბოლოს ასადმა და ბიბილოვმა ხელი მოაწერეს დე ფაქტო სამხრეთ ოსეთის რესპუბლიკასა და სირიას შორის მეგობრობისა და თანამშრომლობის შეთანხმებას. მადლიერების ნიშნად ანატოლი ბიბილოვმა ასადი ცხინვალის რეგიონის უმაღლესი სამხედრო ჯილდოთი, "უაცამონგის" ორდენით დააჯილდოვა. თავის მხრივ, ასადმა ბიბილოვს სირიის უმაღლესი სახელმწიფო ჯილდო გადასცა.

ფოტო: სირიის პრეზიდენტი

ფოტო: სირიის პრეზიდენტი

ფოტო: სირიის პრეზიდენტი

სირიამ რუსეთისგან ოკუპირებული სამხრეთ ოსეთი და აფხაზეთი დამოუკიდებელ რესპუბლიკებად აღიარა. საქართველომ კი პასუხად სირიასთან დიპლომატიური ურთიერთობა გაწყვიტა.

სირიის პრეზიდენტს, ბაშარ ალ-ასადს, სამოქალაქო ომის პერიოდში, რუსეთი ყოველთვის მხარს უჭერდა. პუტინი სირიის ომში კიდევ უფრო აქტიურად მაშინ ჩაერთო, როცა ასადი სამხედრო და ეკონომიკური კუთხით დასუსტდა. რუსული ავიაბომბები ხვდება ისლამური სახელმწიფოს მებრძოლებს, თავდასხმები ასევე ხორციელდება დასავლეთის მიერ მხარდაჭერილ სირიის თავისუფალ არმიასა და მშვიდობიან მოქალაქეებს.

სამხრეთ ოსეთის და აფხაზეთის დე ფაქტო რესპუბლიკები მანამდე აღიარა რუსეთმა, ნიკარაგუამ, ნაურუმ და ვენესუალამ.