ხორავას ქუჩის საქმეზე ცრუ ჩვენების ბრალდებით დაკავებული დ.ღ.-ს ადვოკატის განცხადებით, ბრალდებული ნამდვილად შეხვდა ზაზა სარალიძეს, თუმცა ეს მისივე თხოვნით არ უთქვამს. ადვოკატი თავის დაცვის ქვეშ მყოფზე დაყრდნობით ამბობს, რომ ზაზა სარალიძისთვის მასთან შეხვედრა მნიშვნელოვანი არ იყო.

"ეს, მისი [დ.ღ.-ს] თქმით, გააკეთა თვითონ ზაზა სარალიძის თხოვნით და რაც შეეხება მათ საუბარს, ისეთი მნიშვნელოვანიც არაფერი ყოფილა, რომ გამოძიებას ან სასამართლოს ხელი შეშლოდა", - განაცხადა ადვოკატმა, გოჩა კვარაცხელიამ.

ხორავას ქუჩაზე მოკლული მოზარდების საქმეზე სასამართლომ განაჩენი 31 მაისს გამოაცხადა. სასამართლოს გადაწყვეტილებით, ცნობილი გახდა, რომ პროკურატურას დავით სარალიძის მკვლელი დაკავებული არ ჰყავდა. განაჩენის გამოცხადების შემდეგ დავით სარალიძის მამამ აქციები დაიწყო. მოგვიანებით გარდაცვლილის მამამ, ზაზა სარალიძემ მთავრობას ამ საქმეში მონაწილე პირების დასაკავებლად ვადა 10 ივნისამდე მისცა.

8 ივნისს ხორავას ქუჩაზე მოკლული ორი მოზარდის საქმეზე მოწმეზე ზემოქმედების ბრალდებით 1973 წელს დაბადებული მერაბ მორჩაძე დააკავეს, რასაც 9 ივნისს პროკურატურის ყოფილი მაღალჩინოსნის, მირზა სუბელანის დანაშაულის შეუტყობინებლობის ბრალდებით დაკავება მოჰყვა.

19 ივლისს საქმეზე ცრუ ჩვენების მიცემის ბრალდებით არასრულწლოვანი დ.ღ. დააკავეს. შსს-ს ინფორმაციით, გამოძიებით დადგინდა, რომ დ.ღ.-მ, რომელიც უშუალოდ შეესწრო განსაკუთრებით მძიმე დანაშაულის ჩადენის ფაქტს, განზრახ არასწორი ინფორმაცია მიაწოდა სასამართლოს და მისცა ცრუ ჩვენება.