დაახლოებით ორი კვირის წინ, ეგვიპტეში არქეოლოგებმა უზარმაზარი სარკოფაგი იპოვეს, რომელიც 2 000 წლის განმავლობაში ხელშეუხებლად იყო შენახული.

მის გარშემო უამრავი კითხვა გაჩნდა - რას ინახავდა სარკოფაგი? საბერძნეთის იმდროინდელი ლიდერის, ალექსანდრე მაკედონელის ნაშთს, თუ ძველეგვიპტურ სასიკვდილო წყევლას?

ბევრი ფიქრისა და განსჯის შემდეგ, სარკოფაგი გახსნეს და ექსპერტებს ორივე კითხვაზე უარყოფით პასუხები აქვთ.

სარკოფაგის შიგნით არასამეფო წარმომავლობის სამი მუმია აღმოჩნდა. ისინი მოწითალო-მოყავისფრო სითხეში იწვნენ, რომელსაც გაუსაძლისად ცუდი სუნი ჰქონდა.

ფოტო: Mohamed Abd El Ghany / Reuters

როგორც აღმოჩნდა, არქეოლოგებს 5 სანტიმეტრზეც არ ჰქონდათ თავსახური აწეული, როცა სარკოფაგიდან გოგირდისმაგვარი სუნი ამოვარდა და ისინი იძულებულნი გახდნენ, ადგილი დაეტოვებინათ. დასახმარებლად მათ ეგვიპტის სამხედრო ინჟინრებს მიმართეს.

ნაპოვნი ნაშთები, სავარაუდოდ, ოჯახის წევრებს მიეუკთვნებოდნენ, თუმცა მუმიები არც ისე კარგ მდგომარეობაში იყვნენ და მათი მხოლოდ ძვლები იყო გადარჩენილი.

ერთ-ერთ თავის ქალას ნახვრეტი ჰქონდა. ექსპერტები ვარაუდობენ, რომ ის სავარაუდოდ მებრძოლი იყო და ისრით მოკლეს.

ფოტო: EPA

ეგვიპტის სიძველეების უზენაესი საკონსულოს გენერალური მდივანი ამბობს, რომ მიუხედავად გავრცელებული შიშისა, რომ სარკოფაგის "შეწუხებით" ფარაონის წყევლას გააღვიძებდნენ, მსგავსი არაფერი მომხდარა

"გავხსენით, და მადლობა ღმერთს, სამყარო უკუნითმა სიბნელემ არ მოიცვა. პირველი ვიყავი, ვინც სარკოფაგში ჩაიხედა და ხომ ხედავთ, თქვენ წინაშე ვდგავარ და თავს მშვენივრად ვგრძნობ", - იხუმრა მან ჟურნალისტებთან.

სარკოფაგი ორი მეტრის სიმაღლის და სამი მეტრის სიგრძისაა. ის 27 ტონას იწონის და უდიდესია მათ შორის, რაც აქამდე უპოვიათ. სარკოფაგი ელინისტურ ეპოქაში დაამზადეს, რომელიც ჩვენს წელთაღრიცხვამდე 323 წელს დაიწყო, ალექსანდრე მაკედონელის სიკვდილის შემდეგ.