დღეს თბილისის საკრებულოს სხდომაზე თბილისის მერიაში ვაკანტურ ადგილებზე დასახელებულ კანდიდატებს უყრიან კენჭს. ასარჩევია მერის 2 მოადგილე, ზედამხედველობის სამსახურის და მერიის ადმინისტრაციის ხელმძღვანელები.

დავით ნარმანიას მოადგილეობის კანდიდატურაზე გიგა ნიკოლეიშვილი და ნატო ქიტიაშვილი განიხილებიან, ზედამხედველობის სამსახურისა და მერიის ადმინისტრაციის ხელმძღვანელების პოზიციეზბზე კი გიორგი უკლება და ირაკლი ხუცურაული.

დავით ნარმანია ამბობს, რომ საკრებულოს უმრავლესობა მათ მხარს დაუჭერს და წინააღმდეგობა არ შეხვდებათ:

"დედაქალაქის საკრებულო, დადგენილი წესით იხილავს წარდგენილ კანდიდატურებს. მათ გააჩნიათ შესაბამისი კვალიფიკაცია საიმისოდ, რომ გაუძღვენ იმ მიმართულებებს, რაც მათ ჩაბარდებათ მომავალში".

ნაციონალური მოძრაობა უარყოფითად აფასებს აღნიშნული კანდიდატების წარდგენას. სევდია უგრეხელიძე ამბობს, რომ ის ცვლილებები და კარუსელი, რომელიც ტრიალებს თბილისის მერიაში, ძალიან ცუდად აისახება ამ ქალაქის და მოქალაქეების ცხოვრებაზე.