დადგა ის მომენტი, რომელსაც მთელი მსოფლიო ელოდა. ტაილანდის გამოქვაბულში დაკარგული ბავშვები და მათი მწვრთნელი პრესასთან პირველად გამოჩნდნენ. როგორც BBC წერს, ჟურნალისტებთან შეხვედრის შემდეგ ისინი სახლში ოჯახებს დაუბრუნდნენ.

როგორც ჩიანგარის გუბერნატორმა განაცხადა, ეს იყო ერთადერთი პრესკონფერენცია, სადაც ბავშვები გამოჩნდნენ და ამის შემდეგ ისინი ჟურნალისტების წინაში აღარ გამოვლენ. პრესკონფერენციაზე ასევე იყვნენ ის ექიმი და ორი მაშველი, ვინც ოპერაციის განმავლობაში გამოქვაბულში ბავშვებთან და მწვრთნელთან რჩებოდა.

ფოტო: Reuters

ბავშვები პრესკონფერენციაზე ამბობდნენ, რომ სანამ მაშველებს ელოდნენ გადარჩენისთვის რიგრიგობით გამოქვაბულის კედლებს თხრიდნენ. ერთ-ერთმა მათგანმა ოთხი მეტრის სიღრმის ორმოს ამოთხრა მოახერხა.

მოზარდებმა მომენტი, როდესაც ბრიტანელმა მყვინთავებმა ისინი იპოვეს, აღწერეს, როგორც "არაჩვეულებრივი". გამოქვაბულში მყოფთაგან მხოლოდ ერთმა მოზარდმა, 14 წლის ადულმა იცოდა ინგლისური და მყვინთავებთან პირველი შეხვედრისას სწორედ მან თქვა "გამარჯობა".

მწვრთნელმა აკემ თქვა, რომ როდესაც მყვინთავებმა ჰკითხეს რომელს სურდა პირველი გასულიყო გამოქვაბულიდან, სურვილი არავის გამოუთქვამს. მისივე თქმით, გამოქვაბულში ყოფნის განმავლობაში ისინი ერთმანეთს ძალიან შეეჩვივნენ. აკემ, ასევე, იხუმრა, რომ პირველი ისინი გადაარჩინეს, ვინც გამოქვაბულთან შორს ცხოვრობდა. აკეს ხუმრობა კი სიმართლე აღმოჩნდა, ბიჭებმა ასე თვითონ გადაწყვიტეს ვინ უნდა გასულიყო პირველი.

"ის, ვისი სახლიც უფრო შორს იყო, პირველები გავიდნენ, რათა სხვებისთვის მოეყოლათ, რომ კარგად ვიყავით", - დაამატა მწვრთნელმა.

მწვრთნელმა, ასევე, განმარტა, რომ ცურვა ყველა მათგანმა იცის და ვარჯიშის შემდეგ ერთად არაერთხელ უცურიათ. მედიაში გავრცელებული იყო ინფორმაცია, თითქოს ბავშვების გადარჩენის ოპერაცია რთულდებოდა, რადგან არც ერთმა ბავშვმა ცურვა არ იცის.

რამდენიმე კვირის შემდეგ ბავშვებმა პირველი პრესკონფერენცია გამართეს

ფოტო: Reuters

მისივე თქმით, გამოქვაბულში გასართობად წავიდნენ, რადგან არც ერთი ბიჭი მანამდე იქ ნამყოფი არ იყო. თავიდან გეგმავდნენ, რომ გამოქვაბულში ერთ საათი გაეტარებინათ, თუმცა უკან გამოსვლისას შეამჩნიეს, რომ წყლის დონე მომატებული იყო. როდესაც უკვე გამოქვაბულში დაბნელდა აკე მიხვდა, რომ გამოსვლა გაუჭირდებოდათ და ბავშვები შიგნით გამოქვაბულში შეიყვანა, რათა ღამე გაეთიათ. მას იმედი ჰქონდა, რომ წყლის დონე დილისთვის დაიწევდა. მწვრთნელმა თქვა, რომ სანამ ნესტიან გამოქვაბულში დაიძინებდნენ ერთად ილოცეს.

"კლდიდან წამოსულ წყალს ვსვამდით", - თქვა ერთ-ერთმა 16 წლის პორნჩაიმ. "თავიდან თავს კარგად ვგრძნობდით, მაგრამ ორ დღეში სისუსტე ვიგრძენით".

გუნდის ყველაზე პატარა წევრმა, 11 წლის შანინმა კი დაამატა, რომ ცდილობდა საჭმელზე არ ეფიქრა, რადგან ამის გამო უფრო მეტად შიოდა.

რამდენიმე მოზარდმა თქვა, რომ დასჯის ეშინოდათ, რადგან მშობლებისთვის ნათქვამი არ ჰქონდათ, რომ გამოქვაბულში მიდიოდნენ. ერთ-ერთი დარდობა, რომ საშინაო დავალება არ ჰქონდა გაკეთებული.

სავარაუდოდ, ბიჭები დროებით ბუდისტურ მორჩილებაში იქნებიან - ეს ტაილანდური ტრადიციაა კაცებისთვის, რომლებმაც დიდ უბედურებას გადაიტანენ. კითხვაზე, რა ისწავლეს მომხდარიდან, ერთ-ერთმა უპასუხა, რომ შეეცდებოდა გახდეს კარგი ადამიანი და მოქალაქე.

გამოქვაბულიდან გამოყვანილი ერთ-ერთი ბიჭი სახლში დაბრუნებას აღნიშნავს

ფოტო: Sakchai Lalit / AP

მოზარდები ყვებიან, რომ გამოქვაბულში 10-დღიანი ყოფნისას ფიქრობდნენ მშობლებზე და თავიანთ საყვარელ საჭმელზე.

პრესკონფერენციისთვის კითხვები ბავშვთა ფსიქოლოგთან წინასწარ იყო შეთანხმებული. ამასთანავე ექიმებმა მოზარდების ფიზიკური და მენტალური ჯანმრთელობა შეაფასეს, როგორც "ძალიან კარგი".

ბიჭებმა, ასევე, მადლობა გადაუხადეს ტაილანდის მყვინთავ-მაშველებს, რომლებიც ოპერაციის მსვლელობისას მათთან ერთად იყვნენ გამოქვაბულში და ეთამაშებოდნენ, ზოგიერთმა მათგანმა თქვა, რომ წლების შემდეგ ტაილანდის ფლოტში სურთ მსახურება.

"ამ გამოცდილებამ მასწავლა დავაფასო ცხოვრება, ამან მე გამაძლიერა", - თქვა 11 წლის შანინმა.

ჯამში პრესკონფერენციამ ხალისიანად ჩაიარა. ჟურნალისტებთან მოზარდები ფეხბურთის თამაშით გამოჩნდნენ და თავიანთი გუნდის, Wild Boars-ის მაისურები ეცვათ.

ფსიქოლოგები ამბობენ, რომ ოჯახის წევრებთან მუდმივი კონტაქტი ბავშვებს დაეხმარება, რომ ცხოვრების ჩვეულ რიტმს დაუბრუნდნენ. ექიმები, ასევე, აღნიშნავენ, რომ ფსიქოლოგიური ტრავმის ნიშნები შესაძლოა, რამდენიმე თვეში გამოუვლინდეთ. გადარჩენილთაგან ოთხს, მათ შორის მწვრთნელს, ტაილანდის მოქალაქეობა არ ჰქონდა. როგორც ადგილობრივი ხელისუფლება ამბობს, ოთხივე მათგანისთვის მოქალაქეობის მინიჭების პროცედურა დაწყებულია.

23 ივნისს ტაილანდის გამოქვაბულში დაკარგული 12 ბავშვი და მწვრთნელი ცხრადღიანი ძებნის შემდეგ გამოქვაბულის სიღრმეში ცოცხლები იპოვეს. ამის შემდეგ დაიწყო მათი გადარჩენის რთული ოპერაცია.

სამაშველო ოპერაცია ართულებდა გამოქვაბულში წყლის მომეტაებული დონე და ბავშვების ფიზიკური მდგომარეობა. 8 ივლისს დაიწყო სამაშველო ოპერაცია და გამოქვაბულში ცარჩენილები სამი დღის განმავლობაში ცალ-ცალკე ჯგუფებად გამოჰყავდათ.

გამოყვანის შემდეგ ისინი სასწრაფოდ გადაჰყავდათ საადამყოფოში.