ტაილანდის გამოქვაბულიდან გამოსვლის შემდეგ 11-დან 16-წლამდე 12 ბავშვი და მათი მწვრთნელი პრესასთან პირველად გამოჩნდნენ. მათ დღეს, 18 ივლისს საავადმყოფო დატოვეს.

23 ივნისს დაკარგული ბავშვები და მწვრთნელი ცხრა დღის შემდეგ გამოქვაბულის სიღრმეში ცოცხლები იპოვეს. ამის შემდეგ მიმდინარეობდა მათი გადარჩენის რამდენიმედღიანი ოპერაცია, რომელიც 10 ივლისს დასრულდა. ერთი კვირის განმავლობაში 13-ვე მათგანი საავადმყოფოში ექიმების მეთვალყურეობის ქვეშ იყო.

45-წუთიან პრესკონფერენციაზე გამოქვაბულში გადარჩენილები უპასუხებენ კითხვებს, რომლებიც წინასწარ ფსიქოლოგებთან გადამოწმდა. როგორც ინფორმაცია ვრცელდება, რომ ბავშვები აღელვებულები არიან საზოგადოებისგან წამოსული დიდი ინტერესით, ამიტომ პრესკონფერენცია მკაცრად კონტროლდება.

როგორც ტაილანდის მთავრობის წარმომადგენელმა თქვა, პრესკონფერენციის მიზანია საზოგადოების ინტერესი დააკმაყოფილონ, რათა ბავშვები ცხოვრების ჩვეულ რიტმს დაუბრუნდნენ.

საავადმყოფოში ბავშვებმა და მწვრთნელმა ფოტო გადაიღეს გარდაცვლილი მაშველის, სამარ კუნანის სურათთან. სამარ კუნანი 6 ივლისს სამაშველო ოპერაციის დროს გამოქვაბულში უჟანგბადობით გარდაიცვალა.

ფოტო: Reuters