"ცოტა მაინც ხომ უნდა გასცდეს ქართული პოლიტიკა სოფლის ორღობის ჭორაობას და გადავიდეს რაიმე უფრო ღირებულზე?", - ასე გამოეხმაურა საქართველოს პრეზიდენტი გიორგი მარგველაშვილი ოპოზიციის კრიტიკას.

ოპოზიციაში აცხადებენ, რომ აჭარის მთავრობის თავმდჯომარეობის კანდიდატის, თორნიკე რიჟვაძის მამა დავით რიჟვაძე, რომელიც პოლიციელია, წარსულში აქციებს არბევდა და მომიტინგეებს ფიზიკურად უსწორდებოდა.

"მე ვფიქრობ, რომ ამან უკვე შექმნა გარკვეული უხერხულობა, სერიოზული პოლიტიკური უხერხულობა, როდესაც ჯიუტად არ იმჩნევენ ქართულ იცნებაში", - განაცხადა გიორგი დიასამიძემ TV25-ის ეთერში, რომელიც აჭარის უმაღლესი საბჭოს წევრია ნაციონალური მოძრაობიდან.

პრეზიდენტის განცხადებით, მამის საქციელების წამოძახება შვილზე არანაირ მორალურ კრიტერიუმში არ ჯდება. მარგველაშვილი აკრიტიკებს ნაციონალურ მოძრაობას და ამბობს, რომ იმ ყველაფრის დაყენება კომპრომატად, რომელსაც ის პოლიტიკური ძალა აშავებდა, არის კომიკური.

"რიჟვაძის მამა რომ ინიშნებოდეს, ჩემი პოზიცია მექნებოდა. მე არ ვიცი ის ამბავი როგორ იყო და არც მაინტერესებს" - ამბობს გიორგი მარგველაშვილი TV25-თან საუბარში.

4 ივლისს, ზურაბ პატარიძემ აჭარის მთავრობის თავმჯდომარეობის პოსტი დატოვა. ქართულმა ოცნებამ კი თავმჯდომარეობის კანდიდატად თორნიკე რიჟვაძე წარადგინა.