ადამიანის უფლებათა ცენტრი შეშფოთებულია მარნეულის მუნიციპალიტეტის სამართალდამცველი ორგანოების გულგრილობითა და არაეფექტური რეაგირებით დანაშაულზე, რომელიც მოიცავს დამნაშავისათვის წინასწარი შეცნობით არასრულწლოვან, ორსულ გოგოზე სექსუალურ ძალადობას.

ადამიანის უფლებათა ცენტრის ინფორმაციით, ორგანიზაციას დახმარების თხოვნით მიმართეს მარნეულის მუნიციპალიტეტში მცხოვრები 16 წლის გოგოს მშობლებმა. მათი ინფორმაციით, 8 ივლისს, არასრულწლოვანი ორსული გოგო წინასწარი შეცნობით, ძალადობით გააუპატიურა მეუღლის ნათესავმა 47 წლის მამაკაცმა.

დაზარალებულის ოჯახის ინფორმაციით, მომხდარ ფაქტთან დაკავშირებით მიმდინარეობს სისხლის სამართლის საქმის გამოძიება. დაიკითხა პირი, რომელმაც დანაშაული აღიარა. ოჯახის ინფორმაციით, საგამოძიებო უწყების მიერ დაინიშნა ექსპერტიზა, დაჩქარებული წესით დასკვნის მომზადების მოთხოვნით, მაგრამ ექპერტიზის დასკვნა დღემდე არ არის საგამოძიებო უწყებაში წარდგენილი.

როგორც ადამიანის უფლებათა ცენტრი აცხადებს, მიუხედავად, იმისა, რომ შემთხვევიდან ორ კვირაზე მეტი გავიდა, შესაძლო მოძალადე ისევ დაუსჯელია და არსებობს საფრთხე, რომ იგი სასჯელის მოხდის თავიდან აცილების მიზნით მიიმალოს.

ადამიანის უფლებათა ცენტრმა რეაგირების მიზნით მიმართა საქართველოს შინაგან საქმეთა სამინისტროს და მთავარ პროკურატურას და მოითხოვა, გაატაროს შესაბამისი ღონისძიებები, არასრულწლოვან ორსულ გოგონაზე სექსუალური ძალადობის ფაქტის ეფექტური და დროული გამოძიების წარმოების მიზნით. ორგანიზაციამ, ასევე, მიმართა ლევან სამხარაულის სახელობის სასამართლო ექსპერტიზის ეროვნულ ბიუროს მოთხოვნით, უმოკლეს ვადაში მოამზადოს ექსპერტიზის დასკვნა.