ევროკავშირის საბჭოს თავმჯდომარემ, დონალდ ტუსკმა, აშშ-ის პრეზიდენტს დონალდ ტრამპს მიმართა და მოუწოდა დააფასოს ევროპა, როგორც მოკავშირე. ეს განცხადება დონალდ ტუსკმა 10 ივლისს ევროკავშირსა და ნატოს შორის თანამშრომლობის ახალი ხელშეკრულების ხელმოწერის შემდეგ გამართულ პრესკონფერენციაზე განაცხადა.

ტუსკის თქმით, აშშ-ის პრეზიდენტი "ლამის ყოველდღე აკრიტიკებს ევროპას" თავდაცვის ხარჯების გამო.

"ძვირფასო პრეზიდენტო ტრამპო, ამერიკას არ ჰყავს და არ ეყოლება ევროპაზე უკეთესი მოკავშირე. ჩვენ ვხარჯავთ თავდაცვაზე იმაზე მეტს, ვიდრე რუსეთი და იმდენივეს, რამდენსაც ჩინეთი. ვიმედოვნებ, ეჭვქვეშ არ აყენებთ, რომ ეს არის ინვესტიცია ჩვენს უსაფრთხოებაში, რასაც ვერ ვიტყოდით რუსეთისა და ჩინეთის ხარჯებთან დაკავშირებით. ძვირფასო ამერიკა, დააფასე შენი მოკავშირეები. ბოლოს და ბოლოს, არც ისე ბევრი გყავს", - მიმართა ტუსკმა დონალ ტრამპს.

ბრიუსელის სამიტი, ამერიკის პრეზიდენტ დონალდ ტრამპის მკაცრი განცხადებების ფონზე იმართება. ტრამპი ევროპელი პარტნიონებისგან ითხოვს გაზარდონ ხარჯები და გამოყონ მთლიანი შიდა პროდუქტის 2 პროცენტი თავდაცვაზე.