ჭუბერში, სტიქიის ზონაში მყოფმა ლტოლვილთა და განსახლების მინისტრმა, სოზარ სუბარმა განაცხადა, რომ ორ ოჯახს, რომელთა ერთი სახლი ცოტა ხნის წინ მდინარემ წაიღო, მეორეს კი საფრთხე ემუქრება, ახალ საცხოვრებელს აუშენებენ:

"მე ერთი წუთის წინ დავასრულე საუბარი პრემიერთან. დამაბარა მოსახლეობასთან, რომ ყველას დავუდგებით გვერდით. მთხოვა, პირადად გადავცე ამ ორ ოჯახს, რომ მათ ახალი სახლები ექნებათ, აუშენდებათ ახალი სახლები. დღეს დილიდან გაჩნდა საფრთხე, ვერ მოხერხდა მათი გადარჩენა, ერთ-ერთი პრაქტიკულად არ არსებობს, მეორესაც საფრთხე ემუქრება. საფრთხე არის არამხოლოდ იმ სახლებზე, საფრთხეა ჩვენზეც აქ ვინც ვდგავართ".

სოფელ ჭუბერში სტიქიის გამო კიდევ ერთი სახლი ჩამოინგრა. საგანგებო სიტუაციების მართვის სამსახურის ცნობით, სახლიდან და ყველა საშიში ზონიდან გუშინ მაცხოვრებლების ევაკუაცია განხორციელდა. ადგილიდან გატანილია ნივთები.

გუშინ 5 ივლისს უხვი ნალექის დროს, სოფელ ჭუბერში მთის ნაწილის ჩამოშლამ მდინარე ნენსკრას ადიდება გამოიწვია. მდინარის კალაპოტიდან გადმოსვლის გამო დაიტბორა მიმდებარე ტერიტორია, რამაც ათეულობით თემი გარე სამყაროს მოწყვიტა. უხვმა ნალექმა ჩამორეცხა სოფლებს შორის დამაკავშირებელი საავტომობილო გზები.