მოსკოვის რაიონულმა სასამართლომ რადიო თავისუფლების რუსული ბიურო უცხო ქვეყნის აგენტის სტატუსის დარღვევისთვის 100 ათასი რუბლით (1,5 ათასი აშშ დოლარი) დააჯარიმა, წერს BBC-ის რუსული ბიურო. ეს პირველი ჯარიმაა მედიისთვის, რომელიც რუსეთში უცხო ქვეყნის აგენტად არის მიჩნეული.

გამოცემის ინფორმაციით, ჯარიმა რუსეთის იუსტიციის სამინისტროს სარჩელის საფუძველზე დაეკისრათ. როგორც სარჩელშია ნათქვამი, რადიო თავისუფლებამ ვადებში არ წარადგინა საფინანსო ინფორმაცია, რაც უცხო ქვეყნის აგენტის სტატუსის მქონე ორგანიზაციისთვის სავალდებულოა.

სასამართლოში რადიოსადგურის იურისტმა განაცხადა, რომ კომპანია დოკუმენტაციას ვადებში მიწოდებას ვერ მოახერხებდა, რადგან სამინისტრომ არ განმარტა დოკუმენტაციის შევსების თანმიმდევრობა. მისივე თქმით, დოკუმენტაციის ჩაბარების ვადა უკვე გასული იყო, როცა უცხო ქვეყნის აგენტი მედიისთვის ანგარიშვალდებულების პრაქტიკა ძალაში შევიდა.

რადიო თავისუფლების კორპორაციის დირექტორმა, ტომას კენტმა განაცხადა, რომ უცხო ქვეყნის აგენტის შესახებ კანონის მედიის წინააღმდეგ გამოყენება მედიისთვისა და მისი წარმომადგენლებისთვის დიდი საფრთხეა. კენტს მიაჩნია, რომ ამით რუსეთის ხელისუფლებას სურს ხელი შეუშალოს მედიაკორპორაციის მუშაობას და თანამშრომლების მიმართ უნდობლობა გააჩინოს.

კანონი უცხო აგენტის შესახებ

რუსეთში 2017 წლის შემოდგომაზე მიიღეს კანონი, რომლის მიხედვითაც რუსეთში მომუშავე უცხო ქვეყნის მედიას უცხო ქვეყნის აგენტის სტატუსი ენიჭებოდა.

ეს მოხდა მას შემდეგ, რაც Russia Today-ს აშშ-ში მოსთხოვეს უცხო ქვეყნის აგენტად დარეგისტრირებულიყო. რუსეთის ხელისუფლებამ მსგავსი მოთხოვნა არხზე ზეწოლად მიიჩნია.

რუსეთის კანონის ქვეშ ხვდება როგორც საზღვარგარეთ რეგისტრირებული მედია, ისე რუსეთში რეგისტრირებული, რომელიც დაფინანსებას უცხოეთიდან იღებს. დეკემბერში რუსეთის იუსტიციის სამინისტრომ უცხო ქვეყნის აგენტების სიაში შეიყვანა: ამერიკის ხმა, რადიო თავისუფლება, ტელეარხი Настоящее время და რადიო თავისუფლების რამდენიმე ბიურო.

მედიაზე ისეთივე შეზღუდვები ვრცელდება, როგორც უცხო ქვეყნის აგენტ არასამთავრობო ორგანიზაციებზე. პუბლიკაციებში მათ უნდა მიუთითონ, რომ უცხო ქვეყნის აგენტები არიან. კვარტალურად კი დაფინანსების შესახებ დოკუმენტაცია უნდა წარადგინონ.

აქამდე უცხო ქვეყნის აგენტის სტატუსის დარღვევისთვის არასამთავრობო ორგანიზაციები არაერთხელ დაუჯარიმებიათ.

ამავე თემაზე: