კომპანია ნენსკრა ჰიდროს განცხადებით, სოფელ ჭუბერის დატბორვას ნენსკრა ჰესის მშენებლობასთან კავშირი არ აქვს. მესტიის მუნიციპალიტეტის სოფელ ჭუბერში, იქ სადაც ნენსკრა ჰესი შენდება, დღეს, 5 ივლისს მთის ნაწილი ჩამოიშალა, რამაც ღვარცოფი გამოიწვია.

კომპანიის განმარტებით, 2018 წლის დასაწყისიდან დღემდე ნენსკრა ჰესის მოსამზადებელი სამუშაოები არის გაჩერებული და მხოლოდ გზებისა და ხიდების რეაბილიტაციის სამუშაოები მიმდინარეოდა. განცხადებაში აღნიშნულია, რომ სტიქიური მოვლენა წარმოიშვა სამშენებლო ტერიტორიიდან 5 კილომეტრის ქვემოთ მდინარის მიმართულებით.

ჭუბერის რწმუნებულის, ნინო ვიბლიანის ცნობით, ჭუბერი, სადაც მთა ჩამოიშალა და მდინარემ ტერიტორია დატბორა, ამ ეტაპზე გარე სამყაროს მოწყვეტილია:

"ზარალს რაც შეეხება, არის უამრავი, რასაც დეტალურად ამ ეტაპზე ვერ ვიტყვით. საკომუნიკაციოდ ხუთი ხიდი წაღებულია. მოგლეჯილია ნაპირზე არსებული აბსოლუტურად ყველა დამცავი ნაგებობა, თუკი რამე იყო".

ჭუბერის რწმუნებულმა On.ge-სთან საუბრისას თქვა, რომ წყალი შევარდა სახლებში, ეზოებში, თუმცა სრული სურათი არ იციან, რადგან გადაადგილებას ვერ ახერხებენ.