პოლიტიკური გაერთიანება გირჩი თბილისის ზოოპარკს 13 ივლისისთვის, ზურა ჯაფარიძის პროცესზე, ნახევარი დღით, სირაქლემას სთხოვს. განცხადების ავტორი, რომელიც თბილისის ზოოპარკს გაუგზავნეს, გირჩის წევრი, იაგო ხვიჩიაა.

გირჩი აპირებს, სირაქლემა საქალაქო სასამართლოსთან მიიყვანოს. მათი თქმით, საქართველოში არ არსებობს სასამართლო და საერთო სასამართლოების სისტემა ქვიშაში თავჩარგულ სირაქლემადაა გადაქცეული, რომელიც ქვეყანაში გამეფებულ უსამართლობას არ იმჩნევს.

" ჩვენი ქვეყნის მოქალაქეებისთვის ამ რეალობის თვალსაჩინოდ დემონსტრირებისთვის, გთხოვთ, 13 ივლისისთვის ნახევარი დღით გვათხოვოთ დედალი სირაქლემა. სირაქლემას საქალაქო სასამართლომდე და უკან ტრანსპორტირებას გირჩი უზრუნველყოფს", - წერია ოფიციალურ განცხადებაში.

გირჩის განცხადებაში ვკითხულობთ, რომ ტრანსპორტირების დროს უსაფრთხოების მიზნით, საპატრულო პოლიციას გააფრთხილებენ. პარტია თბილისის ზოოპარკს სთხოვს, საჭიროების შემთხვევაში სირაქლემას პროფესიონალი მომვლელი გამოუყოს.

"მომვლელი ნახევარ დღეს ჩვენთან ერთად გაატარებს, გაგვიწევს რეკომენდაციებს, დააკვირდება პროცესს და დარწმუნდება, რომ ცხოველების მიმართ არაადამიანურ მოპყრობას ადგილი არ ექნება", - ვკითხულობთ გირჩის განცხადებაში.

13 ივლისს საქალაქო სასამართლოში, გირჩის ლიდერის ზურაბ ჯაფარიძის გადადებული პროცესი უნდა გაიმართოს, რომელიც რუსთაველთან მიმდინარე აქციაზე მის დაკავებას უკავშირდება. სასამართლო ზურაბ ჯაფარიძეს პოლიციისთვის დაუმორჩილებლობასა და შეურაცხყოფის მიყენებას ედავება.

განახლება: თბილისის ზოოპარკი: სირაქლემა არ გვყავს