პლატფორმა არა ფობიას წევრი არასამთავრობო ორგანიზაციები მიიჩნევენ, რომ საზოგადოებრივი მაუწყებლის კომენტატორების განცხადებები ფეხბურთის მსოფლიო ჩემპიონატის ტრანსლირებისას ქსენოფობიური და რასისტული იყო. არა ფობიას არხს დისკრიმინაციული განწყობების გაღვივებისგან თავის არიდებისკენ მოუწოდებს.

არა ფობიას მიერ გავრცელებული განცხადების მიხედვით, 22 ივნისს სერბეთი-შვეიცარიის მატჩის ტრანსლირებისას კომენტატორებმა, გიგა გვენცაძემ და დავით ბანანაშვილმა ყურადღება ფეხბურთელების რასობრივ წარმომავლობაზე უსაფუძვლოდ გაამახვილეს:

  • გიგა გვენცაძე: "და შვეიცარიის ნაკრებში წმინდასისხლიანი შვეიცარიელი ძალიან ცოტაა, ვინც ძირითად ნაკრებში თამაშობს. მეკარის ნომერზე თუ ვეტევით ამას და რამდენიმე მოთამაშეზე."
  • დავით ბანანშვილი: "შანჟირი, ბაკა, ჯეჰრამი, ჯემაილი, ნახევარი გუნდი შვეიცარიის ნაკრების წარმოშვებით ალბანელია."
  • გიგა გვენცაძე: "არც რიკარდო როდრიგესია სუფთა სისიხლის შვეიცარიელი, ესპანელ ჩილელი, აკანჟი ნიგერიელია."

"ფეხბურთელთა რასობრივი კუთვნილების მიხედვით დაყოფა და პიროვნების დახასიათება ბიოლოგიური წარმომავლობის ნიშნით („სუფთა (წმინდა) სისიხლის") ქსენოფობიური და რასისტული განწყობების მატარებელია", - წერია განცხადებაში.

არასამთავრობოების აზრით, ამ განცხადებებით არხმა მაუწყებელთა შესახებ კანონის 56-ე მუხლი დაარღვია, რომელიც გადაცემებში კონკრეტული თვისებებისა თუ სტატუსის განსაკუთრებულ ხაზგასმას კრძალავს.

საზოგადოებრივი მაუწყებლის კომენტატორი, გიორგი ზურაბიშვილი არა ფობიას! განცხადებას ცილისწამებასა და სიცრუეს უწოდებს. მისი თქმით, მსოფლიო ჩემპიონატზე კომენტატორების მიერ კონკრეტული ფეხბურთელების ეროვნების დასახელება ქსენოფობიურ და რასისტულ მიზნებს არ ემსახურებოდა და საჭიროა კონტექსტის გათვალისწინება.

"ჯაკამ და შაჩირიმ შვეიცარიის მაისურით გოლები გაიტანეს და აღნიშვნის დროს ხელებით ალბანური არწივი გამოსახეს. ეს არ უნდა ახსნას კომენტატორმა? კონტექსტს საერთოდ არ აქვს მნიშვნელობა?" - წერს ზურაბიშვილი სოციალურ ქსელში.

საზოგადოებრივი მაუწყებლის კომენტატორი პლატფორმა არა ფობიას! არაპროფესიონალიზმსა და ციტირების დროს დაშვებულ შეცდომებშიც ადანაშაულებს.