ფლორიდელი თინეიჯერები, რომლებიც 31 წლის კაცს დახრჩობის დროს ვიდეოს უღებდნენ და იცინოდნენ, არ დაისჯებიან, რადგანაც კანონი მათ დახმარების გაწევას არ ავალდებულებს.

ვიდეოში, რომელშიც 14-დან 19 წლამდე ხუთი თინეიჯერის გადაღებულია, ჩანს, რომ ჯამელ დანი ტბიდან გამოსვლას ცდილობს, თუმცა უშედეგოდ.

მასში ისმის თინეიჯერების ხმაც, "ამოდი, თორემ დაიხრჩობი, ჩვენ არ დაგეხმარებით", რომელსაც სიცილი მოჰყვება. მოგვიანებით თინეიჯერებმა ვიდეო იუთუბზე დაპოსტეს.

იმის გარდა, რომ მათ დასახმარებლად არავისთვის მიუმართავთ, ასევე არ განუცხადებიათ სიკვდილის შესახებაც.

ოჯახმა ჯამელის ძებნა მისი დაღუპვიდან სამ დღეში დაიწყო და პოლიციამ მის სხეულს ორ დღეში მიაგნო.

პოლიციაში გამოკითხვის შემდეგ, თინეიჯერებმა თქვეს, რომ ისინი ფხიზელ მდგომარეობაში არ იყვნენ. დაღუპულის ოჯახი დახმარების არ აღმოჩენის, გულგრილობისა და გარდაცვალების შეუტყობინებლობის გამო თვითმხილველების დასჯას ითხოვდა, თუმცა ფლორიდის შტატის კანონმდებლობა მოქალაქეს სხვისი გადარჩენისა და დახმარების ვალდებულებას არ აკისრებს.

როგორც აღმოჩნდა, შტატის საკანონმდებლო ორგანოში აღნიშნული მუხლი შესაცვლელად კანონპროექტი გასულ წელს მომზადდა, თუმცა საკმარისი მხარდაჭერა ვერ მიიღო.

ასევე შტატის კანონმდებლობა არ ითვალისწინებს სასჯელს გარდაცვალების შეუტყობინებლობაზე, თუ ის ადამიანი, ვინც სხვისი სიკვდილის ფაქტი დამალა, ექიმი არ არის.