"აქამდეც მიგინებია. გუშინაც ვაგინე და კიდევ შევაგინებ. ზვიად ფხაკაძე არის ჩემი შვილის მკვლელებზე ხელის დამფარებელი, შესაბამისად, ჩემი შვილის მკვლელი. ვაგინებ კი არა, ყელი რომ არ გამოვჭერი, რატომ არ უკვირს, საინტერესოა?" - ასე გამოეხმაურა ზაზა სარალიძე ზვიად ფხაკაძის განცხადებას იმის შესახებ, რომ სარალიძე ემუქრებოდა.

გადაცემა არჩევანში საუბრისას სარალიძემ აღნიშნა, რომ მსგავსი საუბარი არაერთხელ ჰქონია ფხაკაძესთან და ჯერ კიდევ მაშინ აგინა საჯაროდ, როცა სასამართლო დარბაზი დატოვა:

"თვითონვე მასწავლეს მოთმინება, მაგრამ არის მომენტი, როცა მართლა გადავდივარ ზღვარს. ვაღიარებ, რომ გადავდივარ. ის რატომ არ თქვა სასამართლო პროცესის შემდეგ, რომ ვუთხარი არსად შემხვდე გზაში-თქო. ეს არ ჩათვალა მუქარად და გინება ჩათვალა?"

დღეს, 26 ივნისს ზვიად ფხაკაძემ კომისიის სხდომაზე განაცხადა, რომ გუშინ ჩვენების მიცემისას მან მუქარის შემცველი შეტყობინებები მიიღო სარალიძისგან. ფხაკაძის თქმით, შეტყობინებების შინაარსი დაკავშირებული იყო მის საპროკურორო საქმიანობასთან. მისივე თქმით, შესაბამის უწყებებს უკვე მიმართა.

სარალიძემ დღეს On.ge-ს განუცხადა, რომ შეტყობინებებს მართლა უგზავნიდა ფხაკაძეს და აგინებდა და ამის მიზეზი ის განცხადებები იყო, რასაც კომისიის სხდომაზე ფხაკაძე აკეთებდა.