ქართული ოცნება მთავრობაში ახალი, სახელმწიფო მდივნის თანამდებობის შექმნის საკითხს განიხილავს. ამის შესახებ ჟურნალისტებთან საუბრისას პარტიაში შეხვედრის შემდეგ ქართული ოცნების წევრმა, ზვიად კვაჭანტირაძემ განაცხადა.

"სახელმწიფო მდივანი შემდეგი ეტაპის რეფორმად იგულისხმება. იგულისხმება სამინისტროებში მინისტრი დარჩეს პოლიტიკურ დონის ფიგურად და მის ქვემოთ იყოს სახელმწიფო მინისტრი. შეიძლება იყოს რამდენიმე სახელმწიფო მინისტრი სხვადასხვა მიმართულებით, გამოითქვა აზრი, რომ გვყავდეს სახელმწიფო მინისტრი ევროინტეგრაციის მიმართულებით საგარეო საქმეთა სამინისტროში, მაგრამ ეს არის ჯერჯერობით მოსაზრებების დონეზე", - განმარტა კვაჭანტირაძემ.

ქართული ოცნების ოფისში მთავრობის ფორმირებასთან დაკავშირებით შეხვედრა მეორე დღეა იმართება. ამ ეტაპზე დაზუსტებით არაა გადაწყვეტილი შემცირდება თუ არა 14-დან 11-მდე სამინისტროების რაოდენობა, როგორც ამის შესახებ პრემიერმა, მამუკა ბახტაძემ განაცხადა.