კომპანია აიისამ გამოხატვის თავისუფლების დასაცავად ახალი პლატფორმა #გაბანტე შექმნა. კომპანიის დამფუძნებელმა, ანანია გაჩეჩილაძემ On.ge-ს უთხრა, რომ ახალ პლატფორმაზე შესაძლებელი იქნება ნებისმიერი დიზაინის პრეზერვატივის აწყობა, მათ შორის, იმათიც, რომლებიც სასამართლოს ორმა ინსტანციამ უხამს რეკლამად მიიჩნია.

გაჩეჩილაძის ადვოკატმა, გიორგი მშვენიერაძემ განაცხადა, რომ აიისა საკუთარი ინიციატივით აღარ შექმნის იმ 4 დიზაინის პროდუქტს, რაც სასამართლომ აკრძალა. ახალი კამპანიით კი შესაძლებელი იქნება, რომ მომხმარებელმა აკრძალული დიზაინები აირჩიოს, როგორც საკუთარი შექმნილი და ისე შეიძინოს.

ფოტო: გიორგი მშვენიერაძე / Facebook

გაჩეჩილაძის განმარტებით, სასამართლოს გადაწყვეტილებით, დიზაინი კომერციულად არ უნდა იყოს პროდუქციაზე დატანილი, სხვა მხრივ აკრძალვა არ არსებობს.

18 ივნისს თბილისის სააპელაციო სასამართლომ ძალაში დატოვა პრეზერვატივების კომპანია აიისას საქმეზე პირველი ინსტანციის გადაწყვეტილება.

გიორგი მშვენიერაძემ პროტესტი გამოუცხადა მოსამართლე ლევან მურუსიძეს, რომელმაც აიისას საქმე სააპელაციო სასამართლოში განიხილა.

მისივე თქმით, სწორედ "****ვაი საკვირველის" დიზაინის პროდუქციის რეალიზებით შემოსული თანხით აიისა გადაიხდის ჯარიმას, 500 ლარს, რომელიც სასამართლომ დააკისრა.

4 მაისს თბილისის საქალაქო სასამართლომ მიიჩნია, რომ პრეზერვატივიების ქართული ბრენდი აიისა მართლმადიდებელი ეკლესიის მრევლის რელიგიურ გრძნობებს ლახავს. სასამართლომ კომპანია 500 ლარით დააჯარიმა და პროდუქციის ამოსაღებად ერთიკვირიანი ვადა მისცა.

საუბარია ორ სხვადასხვა შეფუთვაზე, სადაც თამარ მეფის გამოსახულება და ორთითზეწამოცმული პრეზერვატივია აღბეჭდილი.

სასამართლომ საკითხის განხილვა მას შემდეგ დაიწყო, რაც თბილისის მერიამ ადმინისტრაციულ სამართალდარღვევათა ოქმი გაუგზავნა მოქალაქეთა პოლიტიკური გაერთიანების, ქართული იდეის მოთხოვნის საფუძველზე.