შინაგან საქმეთა მინისტრობის კანდიდატის, გიორგი გახარიას თქმით, არ იარსებებს დახურული სივრცეები, როდესაც საქმე ნარკოტიკებს ეხება.

ამის შესახებ გახარიამ პარლამენტის პლენარულ სხდომაზე გარდამავალი მთავრობის მოსმენაზე განაცხადა. ბასიანსა და გალერიში 12 მაისის სპეცოპერაციის შესახებ გახარიას კითხვა ევროპული საქართველოს წევრმა, ელენე ხოშტარიამ დაუსვა

"ნარკოტიკებთან ბრძოლა არ დაწყებულა ბასიანით და არც დამთავრდება ბასიანით. არ იარსებებს დახურული სივრცეები მაშინ, როდესაც საკითხი ეხება ნარკოტიკებს. ჩვენ ყოველთვის მაქსიმალურს გავაკეთებ იმისათვის, რომ ყველა სახის ნარკოტიკთან ბრძოლა იყოს ეფექტური", - განაცხადა გახარიამ.

სპეცოპერაცია ბასიანსა და გალერიში

11 მაისს გვიან ღამით შსს-მ სპეცოპერაცია ჩაატარა და ნარკორელიზატორობის ბრალდებით რვა პირი დააკავა. დაკავებულებს შორის კაფე გალერის დაცვის სამსახურის უფროსიც იყო. რამდენიმე საათში კი პოლიცია ბასიანში, კაფე გალერისა და ბლოუ-ბარში შევიდა, კლუბის სტუმრები გარეთ გაიყვანა და შენობების ჩხრეკა დაიწყო.

შინაგან საქმეთა სამინისტრო გავრცელებულ განცხადებაში აღნიშნული იყო, რომ სპეცოპერაციას წინ 3-თვიანი საგამოძიებო მოქმედებები უძღვოდა და მათ ნარკორეალიზების ბრალდებით რვა პირი დააკავეს.

12 მაისს ღამით განვითარებულმა მოვლენებმა პარლამენტთან საპროტესტო აქციები გამოიწვია.

როგორც მინისტრის მოადგილე, ნათია მეზვრიშვილი ამბობს, ბასიანსა და გალერიში ნარკოტიკული საშუალებები იყიდებოდა და პოლიციის მიერ საგამოძიებო მოქმედებების ჩატარება ლეგიტიმური იყო. მისივე განმარტებით, პოლიცია მოქმედებდა კანონის ჩარჩოებში. მეზვრიშვილმა, ასევე, აღნიშნა, რომ ეს იყო არა ოპერაცია, არამედ საგამოძიებო ღონისძიება.

შს მინისტრის, გიორგი გახარიას თქმით, 12 მაისს კლუბებში სპეცოპერაცია ნარკორეალიზატორთა დასაკავებლად არ ჩატარებულა. მისივე თქმით, მათი მიზანი რეალიზატორებსა და კლუბის ინფრასტრუქტურას შორის კავშირის დადგენა იყო.