საქართველოს პრემიერ-მინისტრობის კანდიდატი მამუკა ბახტაძე ადასტურებს, რომ კომპანია ცენტრ-პოინტ ინვესტ პლუსში დირექტორის პოზიციას იკავებდა, რომელიც ცენტრ-პოინტ ინვესტის შვილობილი კომპანიაა.

ევროპული საქართველოს დეპუტატი, ირმა ნადირაშვილი დაინტერესდა, რატომ არ აქვს მითითებული მამუკა ბახტაძეს თავის ბიოგრაფიაში ცენტრ-პოინტ პლუსში მუშაობის ფაქტი.

მამუკა ბახტაძის თქმით, კომპანიებში, რომლებიც ირმა ნადირაშვილმა დაასახელა, მუშაობდა და ასევე დასაქმებული იყო სასტუმროების ქსელ რჩეულში, საიდანაც ხდებოდა სასტუმროების დაფინანსება მისი აშენების მიზნით.

"როგორ შეიძლებოდა ეს გამომრჩენოდა, როცა ამ კითხვაზე ორჯერ მაქვს პასუხი გაცემული?", - განაცხადა მამუკა ბახტაძემ.

ირმა ნადირაშვილი დაინტერესდა, რატომ გამორჩა ბიოგრაფიაში ეს ფაქტი მომავალ პრემიერ-მინისტრს.

ბახტაძის თქმით, ის მუშაობდა სასტუმრო ქსელ რჩეულში და ასევე კომპანიაში ცენტრ-პოინტ პლუსში, რომელიც რჩეულმა სასტუმროების აშენების მიზნით დააფინანსა.

ირმა ნადირაშვილი დაინტერესდა იმყოფებოდა თუ არა დაკითხვაზე ცენტრ პოინტის საქმის ფარგლებში.

მამუკა ბახტაძემ ირმა ნადირაშვილს კითხვითვე მიმართა და დაინტერესდა, რატომ უნდა ყოფილიყო დაკითხვაზე.

ნადირაშვილის განმარტებით, დღეს ცენტრ პოინტის მფლობელები ციხეში არიან და მისი დაბარება დაკითხვაზე, როცა ამ კომპანიაში მუშაობდა, ლოგიკურია.

"თქვენ ხართ შერჩევითი სამართლის ნათელი მაგალითი, როცა ამ კომპანიის დამფუძნებლები ციხეში არიან და თქვენ ხართ პრემიერ-მინისტრობის კანდიდატი", - განაცხადა ირმა ნადირაშვილმა.

პრემიერ-მინისტრობის კანდიდატს მინისტრობის კანდიდატებთან ერთად, ევროპული საქართველოს დეპუტატები უსმენენ.

პროკურატურის განცხადებით, ცენტრ პოინტმა მომხმარებლებისგან 64 219 606 ლარი მოიზიდა, თუმცა, თანხა არამიზნობრივად განკარგა, რითაც წლების განმავლობაში არაერთი ადამიანი დაზარალდა, რადგან კომპანიამ არ შეასრულა ნაკისრი ვალდებულებები.