ლგბტ უფლებადამცველებმა უკრაინაში, კიევის ცენტრში თანასწორობის მარში გამართეს, რომელმაც სერიოზული ინციდენტების გარეშე ჩაიარა.

ფოტო: RFE/RL

რადიო თავისუფლების ინფორმაციით, პოლიციამ უსაფრთხოების უზრუნველსაყოფად რადიკალური ჯგუფების 56 წევრი დააკავა. სამართალდამცველების ცნობით, ისინი ღონისძიების ჩაშლას ცდილობდნენ.

ფოტო: RFE/RL

გადაიკეტა ქალაქის ცენტრალური ქუჩები, სადაც თანასწორობის მარშის მონაწილეების უსაფრთხოების მიზნით, ეროვნული გვარდიის ჯარისკაცები და 5 000-მდე პოლიციელი იყო მობილიზებული.

შეტაკება დილით ადრე მოხდა მაშინ, როცა 150-ზე მეტმა მემარჯვენე ფრთის აქტივისტმა მარშის მონაწილეებს გზა გადაუჭრა.

"ათობით ადამიანი, რომელის პოლიციას წინააღმდეგობას უწევდა და გაზს იყენებდა დააკავეს", - განაცხადეს ოფიციალურმა უწყებებმა.

ფოტო: RFE/RL

ფეისბუქზე ულტრანაციონალისტური ჯგუფების წარმომადგენლებმა დაწერეს, რომ პოლიციელები გარს შემოერტყნენ მათ და ხელკეტებით და ცრემლსადენი გაზით გაუსწორდნენ.

ლგბტ მსვლელობის ორგანიზატორებმა, რომლებსაც ულტრამემარჯვენე ჯგუფის წარმომადგენლები დაემუქრნენ, მოუწოდეს სხვა აქტივისტებს, დანიშნულების ადგილამდე არ გამოეყენებინათ პოსტერები, ბანერები ან ლგბტ თემის სიმბოლოები.

ფოტო: RFE/RL

"ჩვენ გვინდა თავისუფლება ჩვენს ქვეყანაში", - ამბობდნენ მარშის მონაწილეები.

"კიევი არის ქალაქი, სადაც არ უნდა იყოს დისკრიმინაცია, ძალადობა. ეს არის ქალაქი, სადაც ყველა უნდა იყოს ის, რაც არის", - განაცხადა მსვლელობის მონაწილე ტიმურ ლევჩუკმა.

ფოტო: RFE/RL

კიევის პოლიციის უფროსის ანდრეი კრიშენკოს ცნობით, დაკავებულთა უმრავლესობა გათავისუფლებულია ადმინისტრაციულ სამართალდარღვევათა ოქმზე ხელმოწერის შემდეგ.