სახელმწიფო უსაფრთხოების სამსახურის განცხადებით, 2016 წლის 26 ივლისს, საოკუპაციო ხაზზე, გორის რაიონის სოფელ კირბალის მიმდებარე ტერიტორიაზე, საოკუპაციო ძალების წარმომადგენლებმა ადგილობრივი მცხოვრების უკანონო დაკავება სცადეს, რა დროსაც ამ უკანასკნელს მიაყენეს ფიზიკური შეურაცხყოფა.

სუს-ის განცხადებით, უწყება გმობს აღნიშნულ ფაქტს და მას მორიგ პროვოკაციულ ქმედებას უწოდებს საოკუპაციო ძალების მხრიდან, რომელიც მათივე თქმით საფრთხეს უქმნის მშვიდობასა და სტაბილურობას ადგილზე.

ინციდენტის თაობაზე ინფორმაცია სუს-მა უკვე მიაწოდა ევროკავშირის სადამკვირვებლო მისიას და მათი თქმით, ეს საკითხი იქნება ერთ-ერთი მთავარი განსახილველი თემა ინციდენტების პრევენციისა და მათზე რეაგირების მექანიზმის ფორმატის მომდევნო შეხვედრაზე ერგნეთში.