რესტორნების ცნობილი ქსელი McDonald's სექტემბრიდან დიდ ბრიტანეთსა და ირლანდიაში პლასტმასის საწრუპების ნაცვლად, ქაღალდისას გამოიყენებს.

ეს იყო ერთ-ერთი ბოლო კომპანია, რომელმაც უარი განაცხადა პლასტმასის ზოგიერთ პროდუქციაზე, რომლის დაშლას, თუ არ გადაამუშავებ, ასობით წელი სჭირდება.

კომპანიის განმარტებით, დიდ ბრიტანეთში ისინი დღეში, დაახლოებით, 1,8 მილიონ ცალ პლასტმასის საწრუპს გამოიყენებენ. სრულად ქაღალდის საწრუპებზე ისინი წლის ბოლოსთვის გადავლენ.

ბრიტანეთის გარემოს დაცვის მინისტრმა მაიკლ გოუვმა განაცხადა, რომ კომპანიამ ამ გადაწყვეტილებით გარემოს დაცვის კუთხით მნიშვნელოვანი წვლილი შეიტანა. მან დაამატა, რომ ეს მაგალითი უნდა იყოს სხვა დიდი კომპანიებისთვის.

პლასტმასის საწრუპების აკრძალვა McDonald's-ის სხვა ქსელებზე ჯერ არ ვრცელდება, თუმცა ცდები დაიწყება აშშ-ის, საფრანგეთისა და ნორვეგიის ცალკეულ რესტორნებში.