ღუდუშაურის კლინიკის დირექტორის მოადგილე, მარინა გელანტია ადასტურებს, რომ 7 ივნისს ოკუპირებული ცხინვალის რეგიონიდან წითელი ჯვრის მიერ მოყვანილი პაციენტი მიიღეს. გელანტიას განმარტებით, მას ქალა-ტვინის ღია ტრავმა აღენიშნებოდა.

მისივე თქმით, ამ ეტაპზე პაციენტი მკურნალობას რეანიმაციულ განყოფილებაში აგრძელებს. მარინა გელანტია პაციენტის ვინაობას არ ასახელებს.

დღეს, 9 ივნისს მოძრაობამ ძალა ერთობაშია განაცხადა, რომ ღუდუშაურის კლინიკაში საოკუპაციო რეჟიმის წარმომადგენლის, ფილიპ ხაჩიროვის დაცვის წევრი, ასლან ჯიოევი მკურნალობს. ფილიპ ხაჩიროვი ახალგორის (ლენინგორის) რაიონის დე ფაქტო ადმინისტრაციის უფროსია. მოძრაობა საოკუპაციო რეჟიმის წარმომადგენლებს არჩილ ტატუნაშვილის წამებასა და მკვლელობაში ადანაშაულებს.

შერიგებისა და სამოქალაქო თანასწორობის სახელმწიფო მინისტრმა, ქეთევან ციხელაშვილმა განაცხადა, რომ გარკვეული პირები დაუზუსტებელ და დაუსაბუთებელ ინფორმაციას ავრცელებენ.

"საჭიროა მეტი პასუხისმგებლობა ასეთ საკითხებთან მიმართებაში იმისათვის, რომ გარკვეული ქმედებები თუ განცხადებები არ აღმოჩნდეს ზიანის მომტანი", - განაცხადა მინისტრმა.