თბილისის იუსტიციის სახლის თანამშრომლებმა უწყების შენობის ჭერიდან ბუშტები წარწერით "თეა, წადი!" ჩამოხსნეს. იუსტიციის მინისტრის, თეა წულუკიანის წასვლის მოთხოვნით გაშვებული ბუშტების ჩამოსასხნელად უწყების თანამშრომლებმა რამდენიმემეტრიანი ნივთი გამოიყენეს.

იუსტიციის სახლის შენობაში რამდენიმე აქტივისტმა ბუშტები წარწერით რამდენიმე წუთის წინ გაუშვეს. იგივე აქტივისტები აქციას მართავენ დღეს, 19 საათზე თბილისის იუსტიციის სახლთან.

მიზეზი, რის გამოც წულუკიანის გადადგომას ითხოვენ:

  • იუსტიციის მინისტრი არის პერსონალურად პასუხისმგებელი სასამართლო სისტემის რეფორმაზე, რომელიც არ განხორციელდა;
  • იუსტიციის მინისტრმა არ იზრუნა დამოუკიდებელი საგამოძიებო ორგანოს ჩამოყალიბებაზე, რომელიც გამოიძიებდა სამართალდამცველთა მიერ ჩადენილ დანაშაულებს;
  • იუსტიციის მინისტრმა მთავარ პროკურორ შოთაძეს მადლობა გადაუხადა კარგად შესრულებული საქმიანობისთვის მისი გადადგომის შემდეგ;
  • იუსტიციის მინისტრის მიერ შერჩეულმა ოთხიდან ვერც ერთმა მთავარმა პროკურორმა ვერ იმუშავა დამოუკიდებლად;
  • თეა წულუკიანი არ აღიარებს და პატივს არ სცემს სასამართლო ხელისუფლებას! ის არ აღასრულებს სასამართლოს გადაწყვეტილებებს გახმაურებულ საქმეებზე, იყენებს ინსტიტუციურ მექანიზმებს პირადი მიზნებისთვის, უკანონოდ ათავისუფლებს თანამშრომლებს სამსახურიდან;
  • იუსტიციის მინისტრმა არამიზნობრივად გაზარდა საშტატო ერთეულთა რაოდენობა იუსტიციის სისტემაში და პარტიული აქტივისტებით გაავსო სამინისტრო;
  • თეა წულუკიანს არ აქვს იურისტის დიპლომი;
  • სტრასბურგმა ორჯერ დაუწუნა მოსამართლეთა სია;
  • წაგებული აქვს თითქმის ყველა საქმე საერთაშორისო დონეზე;
  • იუსტიციის მინისტრს უნდობლობა გამოუცხადა არასამთავრობო სექტორმა.