ხორავას ქუჩაზე მოკლული დავით სარალიძის მამა, ზაზა სარალიძე მისი შვილის საქმეზე შექმნილი საგამოძიებო კომისიის ერთ-ერთ წევრს ქართული ოცნებიდან, ეკა ბესელიას უნდობლობას უცხადებს. სარალიძე ამბობს, რომ დეპუტატმა ის პოლიტიკურ სპეკულაციებში დაადანაშაულა.

"რა უნდა მაგას კომისიაში. მაგ ადამიანს პირდაპირ ვუცხადებ უნდობლობას. აზრი არ აქვს იქნება კომისიაში თუ არა. ფაქტია, თუ ეგ ადამიანი დარჩება კომისიაში, ე.ი. ისევ შეითითხნება საქმე და რაღაც მოხდება, ხო? იმედი მაქვს, რომ დანარჩენებიც არ აჰყვებიან და ისე გააკეთებენ საქმეს, როგორც წესი და რიგია", - განუცხადა რუსთავი 2-ს ზაზა სარალიძემ.

საგამოძიებო კომისიის შექმნა მას შემდეგ გადაწყდა, რაც თბილისის საქალაქო სასამართლოს გადაწყვეტილებით ცნობილი გახდა, რომ დავით სარალიძის მკვლელი დადგენილი არაა. სასამართლოს გადაწყვეტილების შემდეგ დაიწყო აქციები, პარლამენტმა კი ევროპული საქართველოს მოთხოვნა დააკმაყოფილა და ამ საქმეზე საგამოძიებო კომისია შექმნა.