ერგნეთში, არჩილ ტატუნაშვილის საქმეზე, ინციდენტების პრევენციის შეხვედრა იმართება. ქართული მხარე, წინასწარი ინფორმაციით, ექსპერტიზის ბიუროს დასკვნას წარადგენს.

წინასწარი ინფორმაციით, შეხვედრაზე საქართველოს ხელისუფლება კიდევ ერთხელ დააყენებს არჩილ ტატუნაშვილის შინაგანი ორგანოების გადმოცემის საკითხს. წინა შეხვედრაზე ოსურმა მხარემ ღიად დატოვა ეს საკითხი, რადგან არ იყო ექსპერტიზის დასკვნა. დღის წესრიგში ცხრა საკითხია შეტანილი.

სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილის ირაკლი ანთაძის თქმით, შეხვედრაზე ყურადღება გამახვილდება უკანონო ბორდერიზაციაზე და დაკავებაზე, ასევე ადგილობრივი მკვიდრი მოსახლეობისთვის საოკუპაციო ხაზის გასწვრივ გადაადგილების შეზღუდვის პრობლემაზე.

არჩილ ტატუნაშვილის მკვლელობის საქმეს წამების კვალიფიკაცია დაემატა. ექსპერტიზის დასკვნამდე გამოძიება მკვლელობის და თავისუფლების უკანონო აღკვეთის კვალიფიკაციით მიმდინარეობდა.

ტატუნაშვილის საქმე

არჩილ ტატუნაშვილის ცხედარი ოკუპირებული ტერიტორიიდან გარდაცვალებიდან 26 დღეში, 20 მარტს გადმოასვენეს. ტატუნაშვილი თითქმის ერთი თვის წინ, 22 თებერვალს ცხინვალის ციხეში გაურკვეველ ვითარებაში გარდაიცვალა. ოსური მხარის ვერსიით, ის იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებდა, რომ ტატუნაშვილი ინფარქტით დაიღუპა. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ მაშინ პოზიცია შეცვალა.