ადამიანის უფლებათა ცენტრის ინფორმაციით, თბილისის სააპელაციო სასამართლომ თელასის თანამშრომლების მიმართ დისკრიმინაციის ფაქტი დაადგინა და უცვლელად დატოვა თბილისის საქალაქო სასამართლოს 2015 წლის 22 ივლისის გადაწყვეტილება.

მოსარჩელეების - დავით ნადირაშვილისა და კახა სიმონიძის სასარჩელო მოთხოვნა დაკმაყოფილდა. ისინი თელასის მიერ გათავისუფლებული თანამშრომლები არიან და მათ უფლებებს სასამართლოში ადამიანის უფლებათა ცენტრი იცავდა.

„ერთი წლის წინ - 2015 წლის 22 ივლისს თბილისის საქალაქო სასამართლოს სამოქალაქო საქმეთა კოლეგიამ უკანონოდ მიიჩნია დავით ნადირაშვილისა და კახა სიმონიძის სამსახურიდან გათავისუფლება და გააუქმა მათი გათავისუფლების ბრძანებები. სასამართლომ მოსარჩელეები სამსახურში აღადგინა და სს თელასს იძულებითი განაცდურის - 100 000 ლარამდე ანაზღაურება დააკისრა. ამასთან, სასამართლომ დაადგინა შრომით ურთიერთობებში დისკრიმინაციის ფაქტი და მიიჩნია, რომ მოსარჩელეები სს თელასის ადმინისტრაციის მხრიდან მიზანმიმართული დევნისა და შევიწროების მსხვერპლნი გახდნენ“ - ვკითხულობთ განცხადებაში.

2014 წლის 9 სექტემბერს, თელასის გენერალურმა დირექტორმა სერგეი კობცევმა კომპანიის შიდა აქტებისა და საქართველოს შრომის კოდექსის მოთხოვნათა დარღვევით, დაკავებული თანამდებობებიდან უკანონოდ გაათავისუფლა ეკონომიკური უსაფრთხოებისა და დაცვის სამმართველოს უფროსი დავით ნადირაშვილი და ამავე სამსახურის ანალიტიკოსი კახა სიმონიძე.

ადამიანის უფლებათა ცენტრის განცხადებით, მათ შეისწავლეს საქმე, რომლის მიხედვითაც აღნიშნული პირები სამსახურიდან გათავისუფლებულნი იყვნენ საქართველოს შრომის კანონმდებლობის უხეში დარღვევით. ამასთანავე, გათავისუფლებულების მიმართ თელასის ადმინისტრაციის მხრიდან დისკრიმინაციული მოპყრობის ნიშნები იკვეთებოდა.

2014 წლის სექტემბერში, ადამიანის უფლებათა ცენტრის იურისტმა თამარ ავალიანმა, როგორც მოსარჩელეებუს კანონიერმა წარმომადგენელმა, სარჩელი შეიტანა თბილისის საქალაქო სასამართლოს სამოქალაქო საქმეთა კოლეგიაში და მოითხოვა მოსარჩელეების - დავით ნადირაშვილისა და კახა სიმონიძის სამსახურში აღდგენა და უკანონო გათავისუფლებისთვის განაცდურის ანაზღაურება.

2015 წლის 22 ივლისს სასამართლომ ადამიანის უფლებათა ცენტრის მიერ მომზადებული სარჩელი დააკმაყოფილა და მოსარჩელეების მიმართ დისკრიმინაციის ფაქტი დაადგინა. სს თელასმა გაასაჩივრა პირველი ინსტანციის სასამართლოს გადაწყვეტილება თბილისის სააპელაციო სასამართლოში. თბილისის სააპელაციო სასამართლომ 2016 წლის 22 ივლისის გადაწყვეტილებით, არ დააკმაყოფილა თელასის სააპელაციო საჩივარი და უცვლელად დატოვა პირველი ინსტანციის სასამართლოს გადაწყვეტილება.