მეტროს მემანქანეები თბილისის მერის განცხადებას პასუხობენ. მათი პოზიციით, თბილისის მერმა სამი ტყუილი თქვა. პირველი ის, რომ მემანქანეები ხელფასების მომატებას, მეტროს მგზავრობის საფასურის ზრდის ხარჯზე, არ ითხოვდნენ.

"ეს ინფორმაცია არის სიცრუე და დარწმუნებული ვარ მასაც ატყუებენ. ჩვენ ასეთი განცხადება არ გაგვიკეთებია", - აცხადებენ მემანქანეები საგანგებო ბრიფინგი.

მათივე თქმით, მერის განცხადება, რომ მათი ხელფასები 1 600-დან 1 800 ლარამდე მერყეობს არასწორია და მათი ხელფასის ოდენობა 1 150 ლარია.

მემანქანეების თქმით, მერის და სატრანსპორტო კომპანიის განცხადება, რომ ეს არის უკანონო გაფიცვა სიმართლეს არ შეესაბამება

"ეს არ არის უკანონო გაფიცვა და ეს არის კონსტიტუციური და ვიქცევით ისე როგორც ითხოვს კანონი", - აცხადებენ მემანქანეები. მათი თქმით, მეტროს შეჩერება მემანქანეების ჯანმრთელობის მდგომარეობას გამოიწვია, ისინი არ იყვნენ მზად ცვლაში მუშაობისთვის.

მემანქანეები კახა კალაძის გლდანის დეპოს მიმდებარე ტერიტორიაზე მისვლასა და მოლაპარაკებას ითხოვენ,

"როცა სხვა ადამიანების ხელფასი მოყავს მაგალითად, საზოგადოებას აპირისპირებს და თუ დაბალი ხელფასი აქვთ, ეს მერიის სირცხვილია. ეს არის უტიფრობა", - აცხადებენ მემანქანეები.

ისინი განმარტავენ, რომ გაფიცულები არა მარტო მეტროს მემანქანეები, არამედ მეტროპოლიტენის 500-დე თანამშრომელია.

"ერთობა 2013-ში გაერთიანებული 240 მემანქანე, ანუ 100% მემანქანეებისა შიმშილობენ და ჯანმრთელობის პრობლემა აქვთ. კომპანია ადგილზე შესვლისა და სველი წერტილებით სარგებლობის უფლებაც არ გვაძლევს. ჩვენ ვთხოვთ სახალხო დამცველს მოვიდეს და ჩაერთოს ჩვენს საქმეში", - აცხადებენ მემანქანეები საგანგებო განცხადებაზე.

მეტროს მემანქანეებმა გაფიცვა და შიმშილობა გუშინ დაიწყეს, რამაც დღეს, 4 ივნისს, მეტროს პარალიზება გამოიწვია. გაფიცვა ხელფასების ზრდას უკავშირდება. მეტროს მემანქანეები მოითხოვენ, რომ მათი თანამდებობრივი სარგო 45%-ით გაიზარდოს. მემანქანეების გაფიცვის უფლება თბილისის სატრანსპორტო კომპანიამ სასამართლოში ორჯერ გაასაჩივრა. სასამართლოს ბოლო გადაწყვეტილებით, მემანქანეებს გაფიცვის უფლება განუსაზღვრელი ვადით შეუჩერდათ. სატრანსპორტო კომპანია მემანქანეებს კანონის დაცვისკენ მოუწოდებს. მეტროს მემანქანეების გაფიცვის გამო საზოგადოებრივი ტრანსპორტი უფასოდ მოძრაობს.