ხორავას ქუჩაზე მოკლული დავით სარალიძის მამა ნაციონალურ მოძრაობასთან დაკავშირებულ ზვიად კუპრავასთან ურთიერთობაზე საუბრობს. კუპრავას გამო საზოგადოების ნაწილს მიაჩნია, რომ აქცია პოლიტიზირებულია და თავს იკავებს იქ მისვლისგან.

ზაზა სარალიძემ განაცხადა, რომ ზვიად კუპრავა ოჯახის ახლობელია და მისი დახმარების გარეშე ხორავას ქუჩაზე მკვლელობის საქმეს ფარდა არ აეხდებოდა. სარალიძის თქმით, კუპრავას პოლიტიკურ შეხედულებები მისი პრობლემა არ არის.

"2017 წლის პირველ დეკემბერს, როცა ჩემი შვილი დაჩეხეს და მეორე დღეს სული დალია ზვიად კუპრავა მოვიდა ჩემთან ოჯახში და მითხრა თუ წინააღმდეგი არ იქნები, მე ამ საქმეს ჩემებურად გამოვიძიებო. ზვიად კუპრავა არის ჩემი მეგობარი ხალხნო, ჩემი ძმაკაცი, ოჯახის ახლობელი. ადამიანმა დახმარება შემომთავაზა უარი მეთქვა?" - აღნიშნა სარალიძემ TV პირველისთვის მიცემულ ინტერვიუში.

აქციას #ნუმომკლავ საზოგადოების ნაწილში კრიტიკა მოყვა. მათი განცხადებით, აქციას პოლიტიკური სარჩული აქვს და ნაციონალური მოძრაობა ზაზა სარალიძის ინტერესებს იყენებს. აქციას გაემიჯნა სხვადასხვა ჯგუფები, რომლებიც აცხადებენ, რომ ზვიად კუპრავა ნაციონალურ მოძრაობასთანაა კავშირში და აქცია სწორედ მათ იდეებს ატარებს.

ზაზა სარალიძემ გამოსვლისას არაერთხელ ითხოვა, რომ აქციისთვის პარტიული ინტერესები არ დაებრალებინათ. მან განაცხადა, რომ მის ზურგს უკან პოლიტიკა არ იდგა და შვილის სულს არავის მიჰყიდდა.

თბილისში აქცია #ნუმომკლავ მეორე დღეა იმართება. აქცია მას შემდეგ დაიწყო, რაც თბილისის საქალაქო სასამართლოს გადაწყვეტილებით ხორავას ქუჩაზე მოკლული დავით სარალიძის მკვლელი ვერ დადგინდა.

გაიგეთ მეტი ხორავას ქუჩაზე არასრულწლოვნების მკვლელობისა და შემდეგ განვითარებული მოვლენების შესახებ