ქართული მარშის წევრი კონსტანტინე მორგოშია, სხვა მხარდამჭერებთან ერთად ფილარმონიასთან ნაციონალური მოძრაობის წინააღმდეგ და ზაზა სარალიძის მხარდასაჭერად აქციაას აანონებს.

კონსტანტინე მორგოშიას თქმით, ის არ მიდის აქციაზე ქართული მარშის სახელით. მისივე განმარტებით, აქციის მონაწილეები არ აპირებენ კონტრაქციის ჩატარებას და პარლამენტთან მისვლას.

მორგოშიას თქმით, ისინი ასევე დაგმობენ ზაზა სარალიძის მხარდამჭერი აქციის პოლიტიზირებას.

On.ge ესაუბრა ულტრანაციონალური დაჯგუფების ქართული მარშის ლიდერს სანდრო ბრეგაძეს, რომელმაც განაცხადა, რომ ფილარმონიასთან აქციაზე ორგანიზაციის არც ერთი დამფუძნებელი არ მივა.

თავდაპირველად ფილარმონიასთან შეკრებისკენ მოსახლეობას დრამატურგმა გურამ ქართველიშვილმა მოუწოდა.

ქართველიშვილი ამბობს, ის მოუწოდებს "საზოგადოების სუფთა ნაწილს", შეიკრიბონ ფილარმონიასთან და ერთად გამოხატონ პროტესტი. მისი თქმით, მიუღებელია, რომ ზაზა სარალიძის მხარდასაჭერად რუსთაველზე ნაციონალური მოძრაობის წევრები არიან შეკრებილები.

საქართველოს პარლამენტთან ზაზა სარალიძის მხარდამჭერი აქცია 16:00-ზე განახლდა. აქციის მთავარი მოთხოვნაა მთავრობის გადადგომა, სამართლიანობის აღდგენა და ხორავას ქუჩის საქმეზე მტკიცებულებების და დამნაშავეების დამალვაში მონაწილე პირების დასჯა. აქციას შეუერთდნენ, სტუდენტები, მოქალაქეები, მოსწავლეები, საზოგადო მოღვაწეები, პოლიტიკოსები და არასამთავრობოები.

გუშინ, 31 მაისს თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს სარალაძის ნაწილში მუხლი შეუცვალეს და განზრახ მკვლელობიდან, მკვლელობის მცდელობად გადაკვალიფიცირდა.

განაჩენის გამოცხადების შემდეგ ზაზა სარალიძემ პროკურატურასთან აქცია გამართა და შოთაძის გადადგომა და საქმეში გარეული პირების დასჯა მოითხოვა. რამდენიმე საათში ირაკლი შოთაძე გადადგა.

პარლამენტის თავმჯდომარემ, ირაკლი კობახიძემ განაცხადა, რომ საქმეზე საპარლამენტო საგამოძიებო კომისია შეიქმნება. ეს არის პირველი შემთხვევა, როდესაც სისხლის სამართლის დაუსრულებელ საქმეზე საპარლამენტო საგამოძიებო კომისია იქმნება. პრემიერმა კი განაცხადა, რომ საქმეს შსს უკან იბრუნებს და გამოძიება განახლდება.