გირჩის პრეზიდენტობის კანდიდატის, ზურა ჯაფარიძის, განცხადებით, ხორავას ქუჩაზე მომხდარ მკვლელობასთან დაკავშირებით აქციას საწყის ეტაპზე კონკრეტული და დროში სწრაფად შესრულებადი მოთხოვნები უნდა ჰქონდეს, რომლებიც უშუალოდ ზაზა სარალიძის ინტერესიდან - დაისაჯოს მისი შვილი მკვლელები - უნდა ამოდიოდეს.

იმ შემთხვევაში, თუ მთავრობა არ გაითვალისწინებს აქციის მონაწილეთა კონკრეტულ და დროში სწრაფად შესრულებად მოთხოვნებს (მაგ.: საგამოძიებო კომიისიის შექმნა, სადაც უმრავლესობას ოპოზიციური პარტიები შეადგენენ და კომისიის სხდომები იქნება ღია და გამჭვირვალე), ჯაფარიძის აზრით, მათ ექნებათ ლეგიტიმური უფლება, წამოაყენონ უფრო დიდი პოლიტიკური მოთხოვნები.

ჯაფარიძის თქმით, წინააღმდეგ შემთხვევაში, ეს აქციაც ისევე დასრულდება, როგორც 13 მაისის მოვლენები.

"გასაგებია, რომ პარლამენტში მყოფი სხვა ოპოზიციური ჯგუფების მიმართაც საზოგადოებაში არსებობს არაერთგვაროვანი დამოკიდებულება, მაგრამ მათ, მინიმუმ, ის მოტივაცია აქვთ, რომ მაქსიმალურად გააშავონ ოცნება და ამის ხარჯზე მოიპოვონ პოლიტიკური დივიდენდები. ეს ნიშნავს, რომ თუ რამე დამალა ოცნების პროკურატურამ, ისინი მაქსიმალურად ეცდებიან ყველაფრის სინათლის შუქზე გამოტანას. შეიძლება, ტყუილებზეც წავიდნენ, მაგრამ ეგეც ატანადია ამ რეალობაში", - აცხადებს ზურა ჯაფარიძე.

ზურა ჯაფარიიძის თქმით, სანდოობისთვის მნიშვნელოვანია ამ კომისიაში მონაწილეობას იღებდნენ სამოქალაქო სექტორის წარმომადგენლებიც და სხდომები იყოს საჯარო.

"რაც მთავარია და, ჩემი აზრით, ყველაზე მნიშვნელოვანია - ამ კომისიაში უნდა იყვნენ ზაზა სარალიძის ნდობით აღჭურვილი პირები. თუ ზაზა სარალიძე არ ენდობა კომისიის შემადგენლობას, ასეთ კომისიას აზრი არ აქვს (ეს პრინციპი უნდა იყოს მომავალში პროკურატურის რეფორმის ერთერთი ამოსავალი პრინციპი - დაზარალებულს უნდა ჰქონდეს პროკურორად ნებისმიერი ადამიანის არჩევის უფლება. ნებისმიერის, ვისაც ენდობა)", - აცხადებს ჯაფარიძე.

მისი თქმით, თუ აქციის მოთხოვნები ამ ეტაპზე იქნება უფრო ზოგადი (მაგ.: სისტემის რეფორმა) ან უფრო პოლიტიკური (მაგ.: მთავრობის გადაყენება) და გასცდება ზაზა სარალიძის უშუალო ინტერესს - კონკრეტული მკვლელების და ხელის დამფარებლების დასჯა - აქციაზე მოვა ნაკლები ადამიანი და შეუძლებელი იქნება რაიმე შედეგის მიღება (ეს დაემართა 13 მაისის აქციას).

"თუ ამ ლოგიკას ეთანხმებით, მაშინ გასაგებია რომ ყველა, ვინც დღეს ცდილობს გაუაზრებელი მოთხოვნები დააყენოს, აზიანებს აქციას და უსინდისოდ მოქმედებს საკუთარი პოლიტიკური მიზნებიდან გამომდინარე (ცხადია, ეს არ ეხება ზაზა სარალიძეს)", - აცხადებს ზურა ჯაფარიძე.

ზურა ჯაფარიძის თქმით, არანაირი შინაარსი არ აქვს ადამიანების გაკიცხვას იმის გამო, რომ ისინი ერიდებიან პოლიტიკოსებთან და პარტიებთან აფილირებას. ერთი - ამის საკმარისი საფუძველი აქვთ; ორი - გაკიცხვით ისინი აზრს არ შეიცვლიან.

"მე თუ დავდგები ტრიბუნასთან და ვიყვირებ, ზუსტად ვიცი, რომ ამით დავაფრთხობ ბევრს (მიუხედავად იმისა, რომ საკუთარ თავზე არ ვარ მაინც და მაინც ცუდი წარმოდგენის), ვინც სხვა შემთხვევაში გვერდით დაუდგებოდა ზაზა სარალიძეს. და არ მგონია ეგ მორალური საქციელი", - აცხადებს ზურა ჯაფარიძე.