ხორავას ქუჩაზე მოკლული ლევან დადუნაშვილის ოჯახის ადვოკატის თქმით, სასამართლომ გამამტყუნებელი განაჩენი გამოუტანა იმ პირს, ვისაც ლევან დადუნაშვილის მკვლელობა ედებოდა ბრალად:

"მას ბრალი დაუდგინდა დასრულებულ მკვლელობაში, წინასწარი შეცნობით, არასრულწლოვნის მიმართ", - განაცხადა ადვოკატმა.

მისივე თქმით, დავით სარალიძის მკვლელობისთვის ბრალდებულს ბრალი გადაუკვალიფიცირდა: "მკვლელობის მცდელობაში გადაუკვალიფიცირა დანაშაული. სასამართლო დასაბუთებულ გადაწყვეტილებას როდესაც ჩაგვაბარებს მერე შევაფასებთ, რამდენად სწორია. დათოს ნაწილში გაგვიჩნდა პროტესტის განცდა. ფაქტობრივად დათოს მკვლელი დადგენილი არ არის."

დღეს, 31 მაისს სასამართლომ ხორავას ქუჩის საქმეზე დასკვნა გამოიტანა. ხორავას ქუჩაზე მოკლული ლევან დადუნაშვილის მკვლელობის საქმეზე თბილისის საქალაქო სასამართლომ გამამტყუნებელი განაჩენი გამოიტანა. რაც შეეხება მეორე მოკლულს, დავით სარალიძეს, მისი მკვლელობის საქმეზე მოსამართლემ ბრალი მკვლელობიდან მკვლელობის მცდელობაზე გადააკვალიფიცირა. შესაბამისად, ამ დროისათვის უცნობია, ვინ მოკლა არასრულწლოვანი დავით სარალიძე.