რუსეთის საპატრიარქოს დელეგაციის ერთ-ერთმა მღვდელმსახურმა განაცხადა, რომ რუსეთის საპატრიარქოს წარმომადგენელი საქართველოში არავის ინტერესების დამცველი არ იქნება, არამედ ის რუსული ეკლესიის სახე იქნება.

"მამა ვლადიმერის გამოგზავნა რუსეთის მართლმადიდებელი ეკლესიის სინოდმა გადაწყვიტა. დიდი ხანია რუსეთში არსებობს საქართველოს ეკლესიის წარმომადგენლობა. ეკლესიაში წირვა-ლოცვა სრულდება ქართულ ენაზე. რაც შეეხება მამა ვლადიმერის საქმიანობას, ის სულიერ საზრდოს მიაწვდის საქართველოში მცხოვრებ მართლმადიდებელ რუსებს", - მღვდელმსახურის განცხადების თარგმანს რუსთავი 2 ავრცელებს.

რამდენიმე კვირის წინ ცნობილი გახდა, რომ რუსეთის საპატრიარქო საქართველოში წარმომადგენელს გზავნის. პატრიარქ კირილესა და სინოდის გადაწყვეტილებით სასულიერო პირი რუსულენოვანი მრევლისთვის იქადაგებს და საჭიროების შემთხვევაში რუსეთის ეკლესიის პოზიციას წარმოადგენს.

განცხადებაში, რომელიც რუსეთის საპატრიარქოს ვებ-გვერდზეა გამოქვეყნებული, წერია რომ გადაწყვეტილება შეთანხმებულია საქარველოს საპატრიარქოსთან.