მეტროს მემანქანეების დამოუკიდებელი პროფესიული კავშირის ერთობა 2013-ის თავმჯდომარის რატი კაპანაძის განცხადებით, 4 ივნისიდან თბილისის მეტროპოლიტენი გაჩერდება.

რატი კაპანაძის თქმით, ისინი ემორჩილებიან საქალაქო სასამართლოს პირველ გადაწყვეტილებას, რომლითაც გაფიცვის უფლება ერთი თვით გადაუვადდათ.

რაც შეეხება მეორე გადაწყვეტილებას, რომლის მიხედვითაც სასამართლომ მეტროს მემანქანეებს გაფიცვის უფლება უვადოდ აუკრძალა, რატი კაპანაძის თქმით, ამ გადაწყვეტილებას არ დაემორჩილებიან და გაფიცვას 4 ივნისიდან განაახლებენ.

მემანქანეთა გაფიცვა

შპს თბილისის სატრანსპორტო კომპანიასთან კოლექტიური შრომითი დავა რამდენიმე თვეა მიმდინარეობს, რომლის ფარგლებში მიმდინარე მოლაპარაკებების წარუმატებლობის გამო, მეტროს თანამშრომლებმა კანონმდებლობით დადგენილი წესით 2018 წლის 3 მაისს გაფიცვა დააანონსეს, რომელიც თბილისის საქალაქო სასამართლოს მიერ 30 დღის ვადით 2018 წლის 3 ივნისამდე გადაიდო.

2018 წლის 21 მაისს თბილისის საქალაქო სასამართლომ, ამჯერად განუსაზღვრელი ვადით შეზღუდა პროფესიულ გაერთიანების წევრი მეტროს მემანქანეების გაფიცვაში მონაწილეობის მიღების უფლება "სამუშაო საათების განმავლობაში".

28 მაისს რკინიგზელთა პროფესიულმა კავშირმა გაავრცელა ინფორმაცია, რომ სატრანსპორტო კომპანია მეტროს გაფიცული მემანქანეების რკინიგზის თანამშრომლებით ჩანაცვლებას გეგმავს. ინფორმაცია სატრანსპორტო კომპანიაში არ დაადასტურეს.