საქართველოს პირველი დემოკრატიული რესპუბლიკის გამოცხადებიდან 100 წლის იუბილესთან დაკავშირებით გამართულ ფორუმზე საქართველოს პარლამენტის თავმჯდომარემ, ირაკლი კობახიძემ ქვეყნის განვითარებაში ქართული დიასპორის წვლილზე ისაუბრა და ყურადღება გაამახვილა უცხოეთში მცხოვრებ თანამემამულეებთან კავშირების გაღრმავების მიზნით, საქართველოს პარლამენტის მიერ, საკონსტიტუციო რეფორმის ფარგლებში განხორციელებულ ცვლილებებზე.

"საქართველოს პარლამენტმა კონსტიტუციაში ღირსეული ადგილი განუსაზღვრა სიტყვებს და ტერმინს "თანამემამულეს" და "უცხოეთში მცხოვრებ თანამემამულეს". ქვეყნის ძირითად კანონში პირველად გაჩნდა ჩანაწერი, რომლის თანახმადაც სახელმწიფო იღებს ვალდებულებას იზრუნოს უცხოეთში მცხოვრები თანამემამულეების სამშობლოსთან კავშირის შენარჩუნებასა და განვითარებაზე", - განაცხადა ირაკლი კობახიძემ.

მისი თქმით, ისტორიულმა უსამართლობამ და განსაცდელმა ქართველ ხალხს დაანახა, რომ უმთავრესია სამშობლოს ერთგულება, სამშობლოს ერთიანობა და ერთმანეთის მხარდამხარ დგომა.

"დღეს ჩვენს ხალხს კვლავ სჭირდება ყველა ეს თვისება, რომელმაც საუკუნეები გამოგვატარა", - განაცხადა პარლამენტის თავმჯდომარემ.

ირაკლი კობახიძემ აღნიშნა, რომ დიასპორული ორგანიზაციების მონაწილეობას ევროინტეგრაციის პროცესში დიდი როლი უნდა მიენიჭოს და ამისთვის პარლამენტი შესაბამისი საკანონმდებლო ცვლილებების განხორციელებას გეგმავს.

"პარლამენტი, ასევე აქტიურად მუშაობს „უცხოეთში მცხოვრები თანამემამულეებისა და დიასპორული ორგანიზაციების შესახებ“ კანონის ახლებურად გააზრებასა და მის შესაბამისობაში მოყვანაზე ქართული სახელმწიფოსა და დიასპორის წინაშე მდგარ გამოწვევებთან. დღეს აშკარაა, რომ ეს ურთიერთობა ახალ სიმაღლეზე უნდა გადავიდეს და აქ უმთავრესი როლი საზღვარგარეთ მოქმედმა დიასპორულმა ორგანიზაციებმა უნდა იკისრონ", - განაცხადა პარლამენტის თავმჯდომარემ.

მისი აზრით, დიდი მნიშვნელობა უნდა მიენიჭოს დიასპორული ორგანიზაციების მონაწილეობას ევროინტეგრაციის პროცესში, უნდა გაძლიერდეს მათი საქმიანობა ადგილსამყოფელ ქვეყნებში.

ირაკლი კობახიძის აზრით, გამოსაძებნია ახალი ფორმა, რაც, ზოგადად, საკანონმდებლო საქმიანობაში საზღვარგარეთ მცხოვრები ქართველების მონაწილეობას გაზრდის.

"ყველა ეს საქმიანობა მიმართულია ჩვენი თანამემამულეების მხარდაჭერისაკენ, მაგრამ, ასევე, საქართველოს მთავარი საგარეო პოლიტიკური მიზნის - ევროპული და ევროატლანტიკური ინტეგრაციის ხელშეწყობისაკენ", - განაცხადა ირაკლი კობახიძემ.

თბილისში, ქართული დიასპორის დღისადმი მიძღვნილი ფორუმი ძლიერი დიასპორა ერთიანი საქართველოსთვის გაიხსნა. ფორუმი საქართველოს პირველი დემოკრატიული რესპუბლიკის გამოცხადებიდან 100 წლის იუბილეს ეძღვნება.