კლუბ ბასიანის დამფუძნებლის, ზვიად გელბახიანის თქმით, თუ კლუბში ნარკოტიკების შეტანაზე მას პასუხისმგებლობა დაეკისრება, მაშინ, ნარკოტიკების საზღვარზე შემოტანისთვის პასუხი, შინაგან საქმეთა მინისტრმა, გიორგი გახარიამაც უნდა აგოს. მისი თქმით, გახარია უნდა გადადგეს. ამის შესახებ გელბახიანმა დაკითხვის შემდეგ განაცხადა.

"რეალიზაციის ნაწილში იყო კითხვა, თუ შევამჩნიე ვინმე ტერიტორიაზე, რაზეც ვუპასუხე, რომ მაქსიმალურად ვცდილობთ მსგავსი ფაქტები ავღკვეთოთ ტერიტორიაზე და ჩვენი დაცვის წევრები მუდმივად ცდილობენ, იმ შემთხვევაში თუ რამე გამოვლინდა ეს აღკვეთოს. იმედი მაქვს, რომ ნარკოტიკები აქ არ მზადდება, რაც შემოდის, საზღვრიდან შემოდის." - განაცხადა გელბახიანმა.

11 მაისის ღამეს და 12-ის გამთენიისას, თბილისის ღამის კლუბებში ბასიანსა და გალერიში სპეცოპერაცია ერთდროულად დაიწყო. კლუბები დაატოვებინეს ყველა სტუმარს ისე, რომ პირადი ნივთების გამოტანის საშუალებაც არ მისცეს და მიზეზი არ განუმარტეს.

როგორც მინისტრის მოადგილე, ნათია მეზვრიშვილი ამბობდა, ბასიანსა და გალერიში ნარკოტიკული საშუალებები იყიდებოდა და პოლიციის მიერ საგამოძიებო მოქმედებების ჩატარება ლეგიტიმური იყო. მისივე განმარტებით, პოლიცია მოქმედებდა კანონის ჩარჩოებში.

როგორც მოგვიანებით, შს მინისტრმა, გიორგი გახარიამ აღნიშნა, 12 მაისს კლუბებში სპეცოპერაცია ნარკორეალიზატორთა დასაკავებლად არ ჩატარებულა. მისივე თქმით, მათი მიზანი რეალიზატორებსა და კლუბის ინფრასტრუქტურას შორის კავშირის დადგენა იყო.